Фермерлар Парижни мингта трактор билан қамал қилмоқчи

Франциялик фермерлар агар ҳукумат тугунли дерматит касаллиги авж олгани сабабли чорва молларини мажбурий сўйишни тўхтатмаса ва Евроиттифоқнинг MERCOSUR (Жанубий Америка давлатларининг иқтисодий-сиёсий интеграция блоки) мамлакатлари билан савдо келишуви имзоланишига тўсқинлик қилмаса, Парижни мингта трактор билан қамал қилиш билан таҳдид қилди. Бу ҳақда “Қишлоқ хўжалигини мувофиқлаштириш” ( Coordination Rurale) касаба уюшмасининг маҳаллий бўлинмаларидан бирига раҳбарлик қилувчи Жозе Перес баёнот берди.

“Рождество яқинлашмоқда ва менимча, уни оилаларимиз ва болаларимиз билан ўтказишимиз керак. Тайёргарлик кўринг, бироз дам олинг. Агар ҳеч нарса ўзгармаса, акцияларни қайта бошлаймиз. Битта қўнғироқнинг ўзи етарли бўлади ва биз Парижда мингта трактор билан йиғиламиз”, дейди Перес.

Перес агар 2026 йил 5 январгача ҳукумат сиёсатида ўзгариш бўлмаса, “Парижни ўраб олиш” ғоясини ҳам тилга олган.

Маълумот учун, сўнгги бир неча кундан буён франциялик фермерлар мамлакатнинг жануби-ғарбида автомобиль йўлларини тўсиб, тугунли дерматит касаллиги сабабли ҳайвонларнинг сўйилишига қарши норозилик билдирмоқда. Бу юқумли касаллик бўлиб, иситма, териости тўқималари ва бошқа аъзоларнинг шишиши билан кечади. У одамлар учун хавфли эмас, бироқ қорамол учун ўта хавфли ва кўпинча ўлимга олиб келади.

Шунингдек, аграрлар MERCOSUR мамлакатлари билан эркин савдо тўғрисидаги битимга ҳам қарши чиқмоқда. Аввалроқ Еврокомиссия раҳбари Урсула фон дер Ляен Еврокенгаш саммити якунларига кўра, мазкур келишувни имзолаш камида январь ойигача кечиктирилганини маълум қилган.

2024 йилда ҳам Европа Иттифоқи мамлакатларида MERCOSUR билан эркин савдо келишувига қарши фермерларнинг оммавий норозилик намойишлари бўлиб ўтган. Улар санитария ва экологик талаблари нисбатан юмшоқ бўлган мамлакатлардан арзон импорт товарлари Европа бозорини тўлдириб юборишидан хавотирда. Аллақачон қийин аҳволда бўлган европалик фермерлар ушбу келишув Лотин Америкаси фермерлари билан “адолатсиз рақобат” туфайли Европа қишлоқ хўжалиги маҳсулотлари савдосининг янада камайишига олиб келишидан қўрқмоқда.

Эслатиб ўтамиз, аввалроқ Грецияда бутун мамлакат бўйлаб эълон қилинган умумий иш ташлаш паромларнинг портда қолиб кетишига ва пойтахт бўйлаб жамоат транспорти фаолиятининг издан чиқишига сабаб бўлганди.