Фарғонада ота машина сабаб ўғлини ўлдирди

Фарғона вилоятида машина ортидан келиб чиққан жанжал сабаб ота ўғлини ўлдирди. Бу ҳақда Олий суд матбуот хизмати хабар берди.

Маълум қилинишича, cудланувчи эркакнинг ўғли ўзга бир шахсдан автомашина ижарага олиб, фойдаланиб юрган. Орадан вақт ўтиб, ижарага олинган машинани 2700 АҚШ доллари қарз эвазига яна бир шахсга гаровга берган. Отаси қарзни тўлаб, транспорт воситасини эгасига қайтарган.

Бироқ ўғил ижара ва қарз борасидаги аввалги ишини такрорлаган. Ўзи машинасиз қолгани учун отаси томонидан ижарага олинган  Lacetti машинасидан фойдаланиб туришни хоҳлаган. Оқибатда ота ва ўғил ўртасида жанжал келиб чиққан. Шундан сўнг отаси турмуш ўртоғининг ижарадаги уйига кетиб қолган. Бироқ ўғил отасининг ортидан келиб, шу ерда ҳам жанжални давом эттирган.  У отасидан автомашинани беришини талаб қилиб, агар бермаса, ҳар қандай йўл билан бўлса ҳам уни тортиб олишини айтиб, отасини ҳақорат қилган.

Сўнгра ота ўғлини болалар хонасига олиб кириб, дастлаб дазмол билан унинг бош соҳасига бир неча маротаба уриб, ҳушсиз ҳолда полга йиқилганидан сўнг, бош ва танасининг турли жойларига хонада бўлган тикув машинаси билан уриб, вентиляторни бош қисмига отиб, унинг ҳаёти учун муҳим бўлган аъзоларига тан жароҳати етказган. Ўғил олган тан жароҳатлари сабаб воқеа жойида вафот этган.

Мазкур ҳолат юзасидан суд иши жиноят ишлари бўйича Марғилон шаҳар судида кўриб чиқилди. Суд ҳукмига кўра, судланувчи Жиноят кодексининг 97-моддаси  (Қасддан одам ўлдириш) 1-қисмида назарда тутилган жиноятни содир этганликда айбдор деб топилиб, 10 йил муддатга озодликдан маҳрум қилиш жазоси тайинланди.

Эслатиб ўтамиз, аввалроқ Андижон вилоятида ота буфетдан сўроқсиз егулик олиб еган қизини калтаклаб ўлдирганди.