Ёз чилласининг навбатдаги ҳафтаси жазирама ичида ўтади

Ушбу ҳафта давомида Ўзбекистон ҳудуди бўйича об-ҳаво юқори барик ўркач (баландликдаги юқори босимли қатлам) ривожланиши ва Эрон ҳудудларидан иссиқ ҳаво кириб келиши билан белгиланади. Бу ҳақда Республика Гидрометеорология хизмати маркази хабар берди.

Ҳаво ҳарорати кундан-кунга кўтарилади. Ҳудуднинг катта қисмида иссиқ об-ҳавонинг чўққиси ҳафтанинг ўрталарига тўғри келади. 12-13 июль кунлари кундузги ҳаво ҳарорати 40-42 даражагача, жанубда ва чўл ҳудудларда 43-45 даража иссиққача кўтарилади.

Қорақалпоғистон Республикаси ва Хоразм вилоятининг шимолида 11-12 июль кунлари энг юқори ҳарорат 43-45 даража иссиқ бўлиши кутилмоқда.

Кучли иссиқ қисқа муддат кузатилади. 13 июль кунида Ўзбекистоннинг шимоли-ғарбий ҳудудларида, 14 июлда республиканинг барча ҳудудларида атмосферадаги жанубий оқимлар ғарбий оқимларга ўзгаради ва ҳаво ҳарорати 33-38 даражагача, жанубда 40 даража иссиқгача бўлади. Бундай ҳарорат фони дам олиш кунларида ҳам сақланиб туради.

Ушбу ҳафта давомида республиканинг барча ҳудудлари бўйича ҳаво кам булутли ва асосан қуруқ бўлиши кутилмоқда.

10-12 июлда шимолда ва чўл ҳудудларда, 13-14 июль кунлари республика бўйича шамол тезлиги 13-18 м/с гача кучайиши, айрим жойларда чанг-тўзон билан кузатилиши кутилмоқда.

Пойтахт Тошкентда 10-14 июль кунлари асосан кам булутли об-ҳаво бўлади, ёғингарчилик кутилмайди. Шамол тезлиги асосан кучсиз бўлади, 14 июлда 10-12 м/с гача кучайиши мумкин. Бугун, 10 июнь куни кундуз куни ҳарорат 37-39 даража, 11-13 июлда ҳарорат аста-секин кўтарилади ва 12-13 июль кунларига келиб 39-42 даражагача, 14 июлда 36-38 даража иссиқ бўлади.