Эверестда янги рекорд: “Эверест одами” ва “Тоғ маликаси” яна тарих ёзди

“Эверест одами” номи билан танилган Ками Рита Шерпа ва “Тоғ маликаси” Лакпа Шерпа дунёнинг энг баланд чўққиси – Эверестга чиқиш бўйича ўз рекордларини янгилади. Кеча, 17 май куни 56 ёшли Ками Рита Шерпа 32-марта Эверест чўққисига чиқиб, янги жаҳон рекордини ўрнатган бўлса, Лакпа Шерпа эса 11-марта чўққига чиқиб, аёл альпинистлар орасида энг юқори натижани қайд этди. Бу ҳақда BBC хабар берди.

“Бундай тарихий муваффақиятга фақат сўзсиз жасорат, қатъий ўзини тута билиш ва ўз ишига ҳалол садоқат орқали эришиш мумкин”, дейди Непал Бош вазири Балендра Шоҳ.

Маълумот учун, Ками Рита Шерпа биринчи марта Эверест чўққисини 1994 йилда забт этган ва ўшандан бери деярли ҳар йили чўққига чиқиб келган. Баъзи йилларда у ҳатто икки марта ҳам чўққига чиққан. 2018 йилда у Эверест чўққисига 22 марта чиққан биринчи одам бўлган. Шерпа кеча, 17 май куни “14 Peaks Expedition” компанияси мижозларига йўлбошчилик қилаётган пайтда Эверест чўққисини яна бир бор забт этган.

Лакпа Шерпа эса биринчи марта Эверест чўққисини 2000 йилда забт этган ва чўққига муваффақиятли чиқиб, тоғдан тушган биринчи непаллик аёл бўлган. У шунингдек, 2023 йилда Эверест чўққисига кўплаб чиқишлари ва ёлғиз она сифатидаги ҳаёти ҳақида “Тоғ маликаси” номли ҳужжатли фильмнинг қаҳрамони бўлган.

Бу йил Эверестга чиқиш учун қарийб 500 нафар хорижий альпинистга рухсатнома берилган. Кўпчилик рухсатнома талаб қилмайдиган камида битта непаллик гид билан чиқишга ҳаракат қилади.

Эслатиб ўтамиз, 2024 йилда британиялик 23 ёшли Адриана Браунли дунёнинг энг баланд 14 чўққисини забт этган энг ёш аёлга айланган эди. Шунингдек, ўша йили 9 октябрь куни 18 ёшли непаллик Нима Ринжи шериги Пасанг Нурбу билан 8,027 метр баландликдаги Шиша-Пангма чўққисини забт этиб, бунга эришган энг ёш одам бўлганди.