Эстония Лукашенкога мамлакатга киришни бутунлай тақиқлади

Эстония ҳукумати Беларусга қарши 2020 йилда қабул қилинган санкцияларни Минскнинг президентлик сайловларидан кейин кенг кўламли норозилик намойишларини бостиргани сабабли доимий равишда жорий қилди. Бу ҳақда ERR хабар берди.

Бу Беларусь фуқароси Александр Лукашенконинг Эстонияга кириши абадий тақиқланганини англатади. Яна 272 Беларусь фуқароси, жумладан, юқори мартабали амалдорлар, судьялар, ҳуқуқ-тартибот идоралари ходимлари, тарғиботчилар ва Лукашенкога яқин бўлганлар ҳам тақиқланган. Таллин, бошқа қатор Европа Иттифоқи давлатлари каби, уни қонуний президент сифатида тан олмайди.

Санкцияларни доимий қилиш ташаббуси Эстония Ташқи ишлар вазири Маргус Цахкна томонидан илгари сурилган. Унинг сўзларига кўра, Лукашенко режими Беларусда фуқаролик ҳуқуқлари билан боғлиқ вазиятни яхшилашга ҳаракат қилмаяпти, бундан ташқари, Минск Россиянинг Украинага бостириб киришини қўллаб-қувватлашда давом этмоқда, бу эса Эстония томонидан босимга бўлган эҳтиёжни кучайтирмоқда.

“Санкциялар киритилганидан бери деярли беш йил давомида Беларусда ижобий ўзгаришлар бўлмади. Биз давом этаётган репрессияга кўз юма олмаймиз, шунинг учун санкциялар чексиз қолиши керак”, дея таъкидлаган Цахкна.

Маълумот учун, Александр Лукашенко 1994 йилдан буён ҳокимият тепасида. 2025 йил январь ойида у еттинчи муддатга сайланди.

2020 йилги президентлик сайловларидан сўнг Беларусда бир неча ой давомида президент истеъфосини талаб қилиб оммавий норозилик намойишлари бўлиб ўтди. Беларусь ҳуқуқни ҳимоя қилиш ташкилотлари маълумотларига кўра, 35 минг намойишчи ҳибсга олинган. Лукашенконинг фикрича, агар у кетса, мамлакатдаги вазият “Украинадагидан ҳам ёмонроқ бўларди”.

Эслатиб ўтамиз, аввалроқ Александр Лукашенко Мустақиллик саройидаги инаугурация маросимида дунёнинг ярми Беларусдаги диктатурани орзу қилиши ҳақида гапирган эди. Лукашенконинг таъкидлашича, мамлакатда сўз эркинлиги билан ҳаммаси жойида.