Estoniya Lukashenkoga mamlakatga kirishni butunlay taqiqladi

Estoniya hukumati Belarusga qarshi 2020 yilda qabul qilingan sanksiyalarni Minskning prezidentlik saylovlaridan keyin keng ko‘lamli norozilik namoyishlarini bostirgani sababli doimiy ravishda joriy qildi. Bu haqda ERR xabar berdi.

Bu Belarus fuqarosi Aleksandr Lukashenkoning Estoniyaga kirishi abadiy taqiqlanganini anglatadi. Yana 272 Belarus fuqarosi, jumladan, yuqori martabali amaldorlar, sudyalar, huquq-tartibot idoralari xodimlari, targ‘ibotchilar va Lukashenkoga yaqin bo‘lganlar ham taqiqlangan. Tallin, boshqa qator Yevropa Ittifoqi davlatlari kabi, uni qonuniy prezident sifatida tan olmaydi.

Sanksiyalarni doimiy qilish tashabbusi Estoniya Tashqi ishlar vaziri Margus Saxkna tomonidan ilgari surilgan. Uning so‘zlariga ko‘ra, Lukashenko rejimi Belarusda fuqarolik huquqlari bilan bog‘liq vaziyatni yaxshilashga harakat qilmayapti, bundan tashqari, Minsk Rossiyaning Ukrainaga bostirib kirishini qo‘llab-quvvatlashda davom etmoqda, bu esa Estoniya tomonidan bosimga bo‘lgan ehtiyojni kuchaytirmoqda.

“Sanksiyalar kiritilganidan beri deyarli besh yil davomida Belarusda ijobiy o‘zgarishlar bo‘lmadi. Biz davom etayotgan repressiyaga ko‘z yuma olmaymiz, shuning uchun sanksiyalar cheksiz qolishi kerak”, deya ta’kidlagan Saxkna.

Ma’lumot uchun, Aleksandr Lukashenko 1994 yildan buyon hokimiyat tepasida. 2025 yil yanvar oyida u yettinchi muddatga saylandi.

2020 yilgi prezidentlik saylovlaridan so‘ng Belarusda bir necha oy davomida prezident iste’fosini talab qilib ommaviy norozilik namoyishlari bo‘lib o‘tdi. Belarus huquqni himoya qilish tashkilotlari ma’lumotlariga ko‘ra, 35 ming namoyishchi hibsga olingan. Lukashenkoning fikricha, agar u ketsa, mamlakatdagi vaziyat “Ukrainadagidan ham yomonroq bo‘lardi”.

Eslatib o‘tamiz, avvalroq Aleksandr Lukashenko Mustaqillik saroyidagi inauguratsiya marosimida dunyoning yarmi Belarusdagi diktaturani orzu qilishi haqida gapirgan edi. Lukashenkoning ta’kidlashicha, mamlakatda so‘z erkinligi bilan hammasi joyida.