Эртага Тошкентнинг учта туманида “свет” ўчирилади

Эртага, 2 апрель куни Тошкент шаҳрининг Бектемир, Учтепа ва Мирзо Улуғбек туманларида “свет” вақтинча ўчирилади. Бу ҳақда “Тошкент шаҳар электр тармоқлари” МЧЖ хабар берди.

Маълум қилинишича, бунга истеъмолчиларга сифатли ва барқарор электр энергияси етказиб берилишини таъминлаш ва электр тармоқларидаги авариявий ҳолатларнинг олдини олиш ҳамда мавжуд электр қурилмаларида таъмирлаш ишлари сабаб бўлган. 

Шу боисдан қуйидаги манзилларда электр таъминоти маълум вақт оралиғида ўчирилади:

• Бектемир тумани: “Абай” МФЙнинг айрим ҳудудларида соат 10:00 дан 17:00 гача;
• Учтепа тумани: “Зарафшон” МФЙнинг айрим ҳудудларида соат 10:00 дан 17:00 гача;
• Мирзо Улуғбек тумани: “Алишеробод”, “Темурийлар” ва “Ижодкор” МФЙларининг айрим ҳудудларида соат 09:00 дан 17:00 гача.

Юқоридаги ҳудудларда таъмирлаш ишлари белгиланган вақтдан аввалроқ якунланиши мумкинлиги ҳам қўшимча қилинган.