Ertaga Toshkentda keng ko‘lamli hashar boshlanadi

Ertaga va indin – 12-13 aprel kunlari Toshkent shahrida keng ko‘lamli hashar o‘tkaziladi. Bu haqda Toshkent shahar hokimligi xabar berdi.

Qayd etilishicha, ko‘p qavatli uylar atrofi va jamoat hududlarini tozalash, obodonlashtirish va yashil maydonlarni ko‘paytirish bo‘yicha umumshahar hashari o‘tkaziladi. Poytaxtning barcha tumanlarida tartib o‘rnatilib, daraxtlar ekiladi, hovlilar bezatiladi.

“Bu – sevimli shahrimiz obodligi va pokligiga qo‘shgan umumiy hissamizdir. Hurmatli toshkentliklar! Hasharda faol ishtirok etishga chaqiramiz! Tozalikni saqlash – bu katta shahar an’anasi, o‘zimizga, qo‘shnilarimizga va aziz Toshkentimizga bo‘lgan hurmat ifodasidir”, deyiladi e’londa.