Эрон ҳукумати намойишларда қанча одам ҳалок бўлганини очиқлади

Эронда мамлакат бўйлаб ўтказилган оммавий норозилик намойишлари вақтида 3117 нафар одам ҳалок бўлди. Бу ҳақда Эрон Ички ишлар вазирлиги ва Шаҳидлар ҳамда фахрийлар жамғармаси қўшма баёнотига таяниб, “Euronews” хабар берди.

Баёнотга кўра, ҳалок бўлганларнинг 2427 нафари тинч аҳоли вакиллари ва хавфсизлик кучлари ходимлари ҳисобланади. Қолган қурбонлар бўйича батафсил маълумот берилмаган.

Мазкур рақамлар инсон ҳуқуқлари ташкилотлари келтираётган баҳолардан анча паст. Хусусан, АҚШда жойлашган Human Rights Activists (HRANA) ташкилоти камида 4902 нафар одам ҳалок бўлганини маълум қилган. “Reuters” агентлигининг эронлик расмийлар орасидаги манбаси эса 18 январь куни “тасдиқланган” 5000 қурбон борлигини билдирган ва бу рақам бир оз ошиши мумкинлигини таъкидлаган.

“Euronews”нинг қайд этишича, намойишлар давомида Эрон ҳукумати интернетга киришни ва халқаро қўнғироқларни блоклаган, шунингдек журналистлар фаолиятини чеклаган. Бу ҳолат зўравонлик миқёсини мустақил равишда баҳолашни жиддий қийинлаштирган. Шу билан бирга, давлатга қарашли тарғибот ресурслари намойишчиларни АҚШ ва Исроил томонидан рағбатлантирилган “бузғунчилар” сифатида тасвирлай бошлаган.

28 декабрь куни иқтисодий қийинчиликлар фонида бошланган норозилик намойишлари қисқа вақт ичида бутун мамлакат бўйлаб кенг кўламли чиқишларга айланган. HRANA маълумотларига кўра, ушбу намойишлар чоғида қарийб 26 500 киши ҳибсга олинган. 

АҚШ Президенти Дональд Трамп илгари эронлик намойишчиларга ёрдам беришга ваъда берган эди. У 16 январь куни Эронга зарба беришдан воз кечиш ҳақида қарор қабул қилганини эълон қилиб, бунга Теҳрон томонидан 800 дан ортиқ намойишчига нисбатан ўлим жазоси ижро этилишидан воз кечилгани сабаб бўлганини айтган. 

Эрон Олий раҳбари Оятуллоҳ Али Хоманаий эса “ички жиноятчиларга” нисбатан раҳм-шафқат кўрсатмасликка чақирган. Орадан кўп ўтмай, Трамп “Эрон учун янги раҳбарият излаш вақти келди” дея баёнот бериб, Хоманаийни “касал одам” деб атаган.