Эрон Европа Иттифоқидан “аламини олди”

Эрон Ислом Республикаси чекловчи чораларга жавобан Европа Иттифоқига алоқадор 12 жисмоний ва саккизта юридик шахсга санкция қўйди. Бу ҳақда бугун, 26 октябрь куни Эрон Ташқи ишлар вазирлиги тарқатган баёнотда айтилади. 

Санкциялар рўйхатига бошқа ташкилотлар қатори Германиянинг “Deutsche Welle” медиа компаниясининг форсча нашрлари ва Франциянинг “Radio France internationale” радиостанцияси киритилган. 

Бундан ташқари, Эрон Германиянинг “Bild” газетаси бош муҳаррирлари Йоханнес Бои ва Александра Вюрцбахга, шунингдек, Европарламентнинг бир қанча депутатларига ва Париж 1-округининг собиқ мэрига қарши санкциялар жорий қилди. 

Эрон Ташқи ишлар вазирлиги баёнотига кўра, бу шахслар ва ташкилотлар Эрон халқига қарши тартибсизликлар, зўравонлик ва террорчилик ҳаракатларига сабаб бўлган фаолиятни амалга оширишда айбланмоқда. 

Қарама-қарши санкциялар

17 октябрь куни Европа Иттифоқи Эроннинг 11 нафар жисмоний ва тўрт ташкилотига нисбатан санкциялар киритди. Қора рўйхатга, хусусан, Эрон вице-полицияси, унинг раҳбари, шунингдек,  бошқа хавфсизлик кучлари, Басиж милицияси ва Ислом инқилоби қўриқчилари корпуси киберхавфсизлик қўмондонлиги киради. 

19 октябрь куни Теҳрон жавоб чораси сифатида Европанинг ўндан ортиқ жисмоний ва юридик шахсларини санкциялар рўйхатига киритди. Улар орасида Ҳукумат Алоқа Маркази – Британия электрон разведка хизмати, BBC Farsi ва Iran International телеканаллари, шунингдек, Британия Ички ишлар вазири ўринбосари Том Тугендхат бор эди. 

20 октябрь куни Европа Иттифоқи Эроннинг учувчисиз учоқларини ишлаб чиқарувчи Shahed Aviation Industries компанияси ва Ислом Республикасининг уч генералига қарши санкциялар киритди. “Европа Иттифоқининг расмий журнали” улар Россияга учувчисиз самолётлар етказиб бериш билан боғлиқлигини даъво қилмоқда. Худди шу куни Буюк Британия ҳам худди шундай санкциялар киритди.