Эрон Россияга учувчисиз қирувчилар берганми? БМТдан текширув ўтказиш талаб қилиняпти

Бирлашган Миллатлар Ташкилотидаги бир қатор Ғарб давлатлари Украинанинг мурожаатини қўллаб-қувватлаб, Эронни Украина ҳудудида фойдаланиш учун Россияга учувчисиз самолётлар етказиб беришда Эронга қўйилган айбловларни текширишга чақиришди. Бу ҳақда ТАССга БМТ Хавфсизлик кенгашидаги манбалар маълум қилди. 

Агентлик суҳбатдошларига кўра, аввалроқ Украинанинг жаҳон ташкилотидаги доимий ваколатхонаси томонидан БМТ котибиятига шундай таклиф билан хат юборилган. Кейинчалик уни Эрон ядровий битимининг европалик иштирокчилари – Буюк Британия, Германия ва Франция қўллаб-қувватлаган, улар даъво қилинган учувчисиз самолётлар Эрон ядровий дастури бўйича Қўшма кенг қамровли ҳаракатлар режасини белгилайдиган Хавфсизлик Кенгашининг 2231-резолюциясини бузишини таъкидламоқда. Қўшма Штатлар аввалроқ Эрон билан ядровий келишувдан чиққан, шунинг учун улар расмий равишда сўровга қўшилмаган, лекин аслида улар ҳам уни қўллаб-қувватламоқда. 

БМТ Хавфсизлик Кенгаши жорий йилнинг 19 октябрь куни бўлиб ўтган ёпиқ йиғилишда Эрон томонидан Россияга учувчисиз учоқларни топширганига оид айбловларни кўриб чиқди. 21 октябрь куни БМТ Хавфсизлик кенгашининг Украина бўйича очиқ йиғилиши бўлиб ўтади. Украинанинг ташкилотдаги доимий вакили Сергей Кислицага кўра,  йиғилишда дронлар мавзуси ҳам кўтарилади. 

Ғарб давлатларининг позицияси шундан иборатки, 2231-резолюция Эронга ушбу маҳсулотлар учун Хавфсизлик Кенгашининг рухсатини олмасдан, муайян турдаги маҳсулотлар билан савдо қилишни тақиқлайди. Учувчисиз усоқлар Хавфсизлик Кенгаши томонидан илгари тасдиқланган рўйхатга киритилмаган. Шу муносабат билан Ғарб давлатлари БМТ котибияти резолюциянинг эҳтимолий бузилишини текшириши мумкин, деб ҳисоблайди. 

Россия ва Эрон дронларни етказиб бериш ҳақидаги айбловларни қатъиян рад этади. Буни 19 октябрь куни БМТ Хавфсизлик Кенгашининг ёпиқ йиғилиши якунлари бўйича икки давлат дипломатлари такрорлади. Шу билан бирга, Россия Федерациясининг БМТдаги доимий вакилининг биринчи ўринбосари Дмитрий Полянский таъкидладики, 2231-резолюция БМТ Котибиятига унинг мумкин бўлган бузилиши ҳолатларини текшириш учун мандат бермайди. Полянский шунингдек, агар котибият шунга қарамай терговда иштирок этса, Россия у билан муносабатларни қайта кўриб чиқишга мажбур бўлишини айтди. 

Бирлашган Миллатлар Ташкилоти котибияти Украинада учувчисиз самолётлардан фойдаланиш билан боғлиқ БМТ давлатлари томонидан тақдим этилган маълумотлар атрофида муҳокамалар давом этаётганини айтди, бироқ тергов ўтказилмаслиги ҳақида аниқ жавоб бермади.