Эрон АҚШнинг бор қудратини кўради – Трамп

АҚШ Президенти Дональд Трамп Эрон Қўшма Штатларга ҳар қандай шаклда ҳужум қилса, АҚШ Қуролли кучларининг бутун куч-қудратини кўришини айтди. Бу ҳақда у Truth Social ижтимоий тармоғида ёзиб қолдирди.

“Агар Эрон бизга қандайдир шаклда ҳужум қилса, АҚШ кучларининг бутун қудрати илгари кўрилмаган миқёсда сизга қарши ишга тушади”, дея ёзган АҚШ раҳбари. 

Шунингдек, Трамп АҚШнинг Исроил томонидан Эронга қарши уюштирилган сўнгги ҳужумларга алоқаси йўқлигини таъкидлаган.

“АҚШ бугунги Исроилнинг Эронга қарши ҳужумида иштирок этмаяпти. Бироқ биз Эрон ва Исроил ўртасидаги музокараларни тезда якунлаб, ушбу қонли можарони тугатишимиз мумкин”, дея қўшимча қилган Трамп. 

Трампнинг ҳужумларга “АҚШнинг қўли йўқлиги” ҳақидаги баёнотини Эрон томони кескин рад этган. Унга кўра, Исроил бундай хавфли агрессия ва минтақада уруш қўзғатишга АҚШнинг ҳамкорлиги, координацияси ёки ҳеч бўлмаганда онгли розилигисиз қўл ура олмасди.

Эслатиб ўтамиз, аввалроқ Эрон Қўшма Штатлар билан 15 июнь кунига режалаштирилган ядровий битим бўйича янги музокара раундини ўтказиш масаласида ҳали қарор қабул қилгани йўқлиги ҳақида хабар берилганди. Сўнгра, кўплаб ОАВлар Эрон АҚШ билан ҳеч қандай музокара ўтказмаслик қарорига келгани ҳақида ёзди, лекин ҳозирча Теҳрон бу хабарларни расман тасдиқлагани йўқ.