Эриксеннинг ҳолати ҳақида маълумот берилди

Дания терма жамоаси ярим ҳимоячиси Кристиан Эриксен Украинага қарши ўртоқлик учрашувида ҳушидан кетганидан сўнг, қўшимча текширувлардан ўтиш учун шифохонада қолади. Бу ҳақда унинг шифокорлари маълум қилди. 

Ҳодиса кеча, 7 июнь куни Оденсе шаҳрида бўлиб ўтган Дания – Украина ўртоқлик учрашуви вақтида содир бўлди. Эриксен 65-дақиқада ҳушидан кетиб, майдонга йиқилган ва унга дарҳол тиббий ёрдам кўрсатилган. Учрашув муддатидан аввал тўхтатилган ва Даниянинг 2:1 ҳисобидаги ғалабаси билан якунланган. Футболчи дарҳол ҳушига келган.

“Кристиан ўзини яхши ҳис қилмоқда ва майдонни ўз хоҳиши билан тарк этди. Менимча, юрак стимулятори керакли тарзда ишлаяпти. У қисқа вақтга ҳушидан кетди, аммо жуда тез ўзига келди ва биз дарҳол у билан мулоқот қилдик”, дейди Дания тиббиёт университети шифокори Мортен Боэзен.

Унинг сўзларига кўра, Эриксен жамоага ўзини яхши ҳис қилаётганини етказишни шахсан сўраган.

“Ҳодиса сабабини аниқлаш учун у энди шифохонада қўшимча текширувлардан ўтиши керак. Биз у билан ва шифохона шифокорлари билан доимий алоқадамиз. Кристиан ўзини яхши ҳис қилмоқда ва мендан барча футболчиларга салом айтиб, унинг аҳволи яхши эканини етказишимни сўради”, дея қўшимча қилди Боэзен.

Маълумот учун, 2021 йилда Дания ва Финляндия ўртасидаги Европа чемпионати учрашувида Кристиан Эриксеннинг юраги тўхтаб қолган эди. Шифокорлар унга бир неча дақиқа давомида биринчи тиббий ёрдам кўрсатган, жумладан юрак массажини амалга оширган.

Кейинчалик даниялик футболчига кардиовертер-дефибриллятор ўрнатиш бўйича операция қилинган. Шу сабабли ўша пайтда “Интер” сафида тўп сурган Эриксен Италия чемпионатида иштирок этиш ҳуқуқидан маҳрум бўлган.