Эрдўған яна Ғазодаги воқеаларни қоралаш билан чекланди

Олам

image

Туркий Давлатлар Ташкилотининг Фаластиндаги инқироз юзасидан тутадиган позицияси бошқа халқаро ташкилотларга ўрнак бўлади. Бу ҳақда Туркия Президенти Ражаб Тойиб Эрдўған бугун, 3 ноябрь куни Туркий давлатлар ташкилотининг Остонада бўлиб ўтган 10-саммитидаги нутқида сўз очди. 

Унинг алоҳида урғулашича, Фаластинда бутун дунё аҳли кўз ўнгида мисли кўрилмаган инсоният фожиаси юз бермоқда.   

“Шифохоналар,  мактаблар, масжидлар,  черковлар ва қочқинлар лагерлари бомбардимон қилинмоқда. Бегуноҳ болалар ваҳшийларча ўлдирилмоқда. 7 октябрдан буён гувоҳи бўлаётганимиз бу шафқатсизликни тушунтириб берадиган ёки баҳона қиладиган тушунча йўқ. Очиғини айтганда,  Ғазода роппа-роса 28 кундан бери инсониятга қарши жиноятлар содир этилмоқда. Туркия ўлароқ биз бу инқироз бошланган илк даврдан принципиал ва инсонпарвар позицияни эгалладик”, дейди у. 

Эрдўған, Анқара Исроил-Фаластин масаласида тинч аҳолига қарши ҳаракатларни маъқулламаслигини ҳар фурсатда айтиб келгани ва бундан кейин ҳам шу фикрда собит қолишини билдирди. 

“Бизнинг устувор вазифамиз тезда инсонпарварлик сулҳини ўрнатишдир. Шунингдек, биз мусулмон, насроний ёки яҳудий бўлишидан қатъи назар, барчанинг хавфсизлигини кафолатлайдиган янги механизмлар устида ишлаяпмиз”, дейди Туркия раҳбари.  

Шунингдек, у, халқаро тинчлик конференцияси учун замин яратиш бўйича ҳаракатларни давом эттираётганини билдирди. Ҳозиргача Туркиядан 10 та самолёт тўла гуманитар ёрдам Ғазо секторига юборилган.

“Шароит имкон берса, янгиларини жўнатишда давом этамиз. Турк дунёси сифатида бирдамлик ва ҳамжиҳатликда ҳаракат қилиш, аввалига қуролли тўқнашувларни тўхтатиш, кейин эса доимий тинчлик йўлини осонлаштиради. Турк Давлатлари Ташкилоти сифатида тутадиган позициямиз бошқа ташкилотларга ҳам ўрнак бўлади”, дейди Туркия раҳбари. 

Шуни алоҳида таъкидлаш ўринлики, Туркиянинг “TRT Haber” телеканали бир неча кун аввал Туркия Президенти Ражаб Тойиб Эрдўған Остонада бўлиб ўтадиган ТДТ саммитида Ғазодаги инқирозни ҳал қилиш истиқболлари бўйича мамлакат позициясини баён қилишини айтган эди. Шунга кўра жамоатчилик ва халқаро экспертлар Эрдўғандан бунданда жўяли таклифни кутганди. Бироқ, Эрдўған яна Ғазодаги воқеаларни қоралаш билан чекланди. 

Эслатиб ўтамиз, саммитда Ўзбекистон Республикаси Президенти Шавкат Мирзиёев Исроил ва Фаластин ўртасидаги можаро масаласига тўхталиб, мазкур муаммонинг ягона ва энг адолатли ечими низони "икки халқ учун икки давлат" тамойили асосида ҳал этиш эканини билдирди. 


Мақола муаллифи

Теглар

геноцид Ражаб Тойиб Эрдўған Исроил-Фаластин Туркий давлатлар ташкилоти Ғазо сектори

Баҳолаганлар

0

Рейтинг

3

Мақолага баҳо беринг

Дўстларингиз билан улашинг