Эрдўған ва Путиннинг музокаралари бошланди (видео)

Бугун, 4 сентябрь куни Сочида Туркия Президенти Ражаб Тойиб Эрдўған ва Россия Президенти Владимир Путиннинг музокаралари бошланди. Бу ҳақда РИА Новости хабар берди.

Президент Эрдўғанни Сочи халқаро аэропортида Краснодар ўлкаси губернатори ўринбосари Александр Руппель, Сочи мэри Алексей Копайгородский, Туркия Республикасининг Москвадаги элчиси Меҳмет Самсар ва бошқа мансабдор шахслар кутиб олган.

Владимир Путиннинг Сочи қароргоҳида Туркия Президенти Ражаб Тойиб Эрдўған билан кенг доирадаги музокаралар бошланган. Расмий учрашув бошланишидан олдин икки давлат раҳбари қисқача суҳбат ўтказган.

“Минтақада хавфсизликни таъминлаш борасида гаплашиб олиш керак бўлган нарсалар бор. Албатта, биз Украина инқирози билан боғлиқ масалаларни эътиборсиз қолдирмаймиз. Дон битими бўйича масалаларни кўтариш ниятида эканлигимизни биламан. Музокаралар учун доимо очиқмиз”, деган Россия раҳбари учрашув бошида.

Шунингдек, у режага кўра, Туркияда Аккую АЭС лойиҳаси давом этаётганини, биринчи энергия блоки 2024 йилда ишга туширилишини таъкидлаган.

Эрдўған эса Путинга Туркиядаги ёнғинларни ўчиришда ёрдам бергани учун миннатдорлик билдирган.

Маълумот учун, Ражаб Тойиб Эрдўған ва рафиқаси Эмина Эрдўған билан бирга Ташқи ишлар вазири Ҳокон Фидан, Энергетика ва табиий ресурслар вазири Алпарслон Байрактар, Ғазначилик ва молия вазири Меҳмет Шимшек, Миллий мудофаа вазири Яшар Гулер ва бошқа Туркия расмийлари ҳам Сочига борган.