Эпштейннинг ўлим олдидан ёзган мактуби очилди

АҚШда жинсий жиноятларда айбланган Жеффри Эпштейннинг камерадоши Николас Тартальоне унинг ўлимидан олдин ёзилган деб тахмин қилинаётган мактуб мазмуни ҳақида маълумот берди. Бу ҳақда “The New York Times” хабар берди.

Қайд этилишича, Тартальоне 2019 йил июль ойида ёзувни топган. Ўша вақтда Эпштейн бўйнида излар билан ҳушсиз ҳолда топилган эди. Кейинчалик, у бошқа бўлимга ўтказилган ва ўз жонига қасд қилиш хавфи сабаб қисқа вақт кузатувга олинган. Ушбу ёзув ҳозиргача сир сақланиб келган ва тахминан 7 йил давомида яширин сақланган.

Эпштейн дастлаб қамоқхона ходимларига бўйнидаги қизил излар ҳақида гапирганда, унга Тартальоне ҳужум қилганини айтган ва ўзида ўз жонига қасд қилиш нияти йўқлигини билдирган. Бироқ, бир ҳафтадан сўнг, у Тартальоне билан муаммоси йўқлигини ва у билан бир камерада ўзини хавфсиз ҳис қилганини айтган.

Тартальоне кейинги телефон суҳбатларида ёзувни қандай топганини батафсил тушунтирган. Унинг сўзларига кўра, Эпштейн бошқа блокка кўчирилгач, у ўз камерасидаги китоб ичидан яширилган ёзувни топган.

“Мен китобни ўқиш учун очдим ва юридик ёзувлар учун мўлжалланган дафтардан юлиб олинган сариқ рангли қоғоз парчаси эди. Ёзувда терговчилар Эпштейн ишини бир неча ой давомида ўрганишган ва “ҳеч нарса топишмаган” деб айтилган. Шунингдек, Эпштейн “Улар мендан нима қилишимни хоҳлашади — йиғлаб юборайми? Хайрлашиш вақти келди” мазмундаги ёзувлар ҳам бор”, деган Тартальоне.

Тартальоне бу ёзувни адвокатларига топширганини айтган, чунки у Эпштейн уни айблашда давом этса, бу ҳужжат ҳимоя сифатида керак бўлиши мумкин эди. Кейинчалик ёзувнинг ҳақиқийлигини текшириш учун қўл ёзуви экспертлари ҳам жалб қилинган.

Бу ёзув федерал суд томонидан алоҳида жиноят ишида махфийлаштирилган. Тартальоне адвокатлари ёзувни ҳақиқий деб тасдиқлаган, бироқ қандай асосда экани очиқланмаган.

Эслатиб ўтамиз, аввалроқ Эпштейн бир неча йил давомида Лондон марказида кўплаб квартираларни ижарага олган ва у ерда жинсий зўравонликка учраган аёлларни жойлаштиргани хабар қилинганди.