Эпштейн Лавровга Трамп ҳақидаги “махфий маълумотлар”ни бермоқчи бўлган – ОАВ

АҚШда вояга етмаганларни  фоҳишаликка мажбур қилганликда айбланган молиячи ва хедж-фонд бошқарувчиси Жеффри Эпштейн 2018 йил июнь ойида Европа Кенгаши раиси Турбьёрн Ягландга ёзган хатида Россия Ташқи ишлар вазири Сергей Лавров билан учрашув ташкил этишни сўраган. “Politico” нашрининг кеча, 12 ноябрь куни ёзишича, Эпштейн бу учрашувда Лавров билан АҚШ Президенти Дональд Трамп ҳақидаги маълумотлар билан бўлишмоқчи бўлган. Бу учрашув Россия ва АҚШ Президентлари Владимир Путин ва Дональд Трампнинг Хелсинкидаги музокараларидан бир ой олдин бўлиши керак эди.

Нашрнинг ёзишича, бу ҳақдаги маълумот АҚШ Конгрессидаги демократлар томонидан 12 ноябрь куни эълон қилинган Эпштейннинг электрон хатларидан аниқланган. Ёзувларда Ягланд Лавров ёрдамчиси билан эртаси куни учрашиши ва Эпштейн билан мулоқот масаласини муҳокама қилишини билдирган. Аммо бу учрашув амалга ошган-ошмагани маълум эмас.

Эпштейн ўз хатларидан бирида ўша пайтдаги Россиянинг БМТдаги доимий вакили Виталий Чуркин билан ҳам Трамп ҳақида гаплашганини ёзган.

“Чуркин ажойиб одам эди. Биз суҳбатлашгандан кейин у Трампни тушунди. Бу қийин эмас. Уни бир марта кўрсанг, ҳаммасини англайсан”, деб ёзади Эпштейн.

“Politico”нинг таъкидлашича, бу электрон мулоқот Эпштейннинг Дональд Трампнинг илк президентлик даврида қабул қилган сиёсий қарорлари ҳақида турли халқаро шериклар билан олиб борган кўплаб ёзишмаларидан фақат биттасидир.

Эпштейн ўз ёзишмаларида 2018 йил 16 июлда Хелсинкида бўлиб ўтган Путин-Трамп саммити натижаларини ҳам муҳокама қилган. Бу саммит АҚШда “Трампнинг Путин олдидаги таслим бўлиши” деб баҳоланган эди.
“Русларда Трамп ҳақида қандайдир маълумот борми? Бугунги кун ҳатто унинг стандартлари бўйича ҳам даҳшатли бўлди”, деб ёзган собиқ молия вазири ва Обама давридаги иқтисодий маслаҳатчи Ларри Саммерс Эпштейнга.

Эпштейн эса унинг почтаси шундай фикрлар билан “тўлиб кетганини” ёзиб, Трампнинг саммитдаги хатти-ҳаракатини олдиндан кутилган деб атаган:

“Менимча, у барчаси жуда яхши ўтди деб ўйлаган. У рақибини “жодулаб қўйдим” деб ишонади... У кўп нарсалардан хабарсиз”.

2025 йил 12 ноябрь куни демократ-конгрессменлар Эпштейннинг янги электрон хатларини эълон қилди. Уларда Дональд Трамп Эпштейннинг вояга етмаганлар иштирокидаги фоҳишалик билан шуғулланганини билгани ҳақида даъволар бор. Масалан, 2011 йилда Эпштейн ўз ҳамкори Гилейн Максвеллга Трамп унинг уйида бир неча соатни кейинчалик жабрланувчи сифатида аниқланган қиз билан ўтказганини ёзган. 2019 йилдаги хатда эса у Трамп “албатта қизлар ҳақида билади, чунки у Гилейнга буни тўхтатишни айтган”, деб таъкидлаган.

Оқ уй матбуот котиби Кэролайн Ливитт 12 ноябрдаги брифингда бу хабарлар “Трамп ҳеч қандай ноқонуний иш қилмаганидан бошқа ҳеч нарсани исботламаслиги”ни айтди.

Трамп эса кейинчалик Truth Social ижтимоий тармоғида ёзиб, “демократлар яна Эпштейн бўйича туҳматларга қайтди, чунки улар ҳукуматнинг иши вақтинча тўхташи (шатдаун) даврида ўзларининг ножўя фаолиятларидан халқ эътиборини чалғитмоқчи”, дея изоҳ берди.