Endi bolalarga zo‘ravonlik qilgan bog‘cha opalar 1 yil ishlay olmaydi

Endi O‘zbekistonda bolalarga zo‘ravonlik qilan pedagoglar maktabgacha ta’lim tashkilotlarida 1 yil ishlay olmaydi. Bu haqda bugun, 9 iyul kuni Senatning 17-yalpi majlisida ko‘rib chiqilgan “Bolalarni ijtimoiy himoya qilish tizimi takomillashtirilishi munosabati bilan O‘zbekiston Respublikasining ayrim qonun hujjatlariga qo‘shimcha va o‘zgartirishlar kiritish to‘g‘risida”gi qonunda so‘z boradi.

Qayd etilishicha, mazkur qonun bilan Ma’muriy javobgarlik to‘g‘risidagi kodeksda ta’lim tashkilotlarida tarbiya va ta’lim berish jarayonida voyaga yetmagan bolalarga nisbatan jismoniy zo‘ravonlik sodir etganlik, shuningdek ularni tahqirlaganlik uchun ma’muriy javobgarlik belgilanmoqda.

Bundan tashqari, pedagogik faoliyatni amalga oshirish jarayonida voyaga yetmaganlarga nisbatan jismoniy va (yoki) ruhiy zo‘ravonlikka oid huquqbuzarlik sodir etganligi uchun ma’muriy javobgarlikka tortilgan shaxslarga nisbatan bir yil muddat davomida maktabgacha ta’lim tashkilotlarida pedagogik faoliyat bilan shug‘ullanishi mumkin emasligi nazarda tutilmoqda.

Shuningdek, davlat yoki nodavlat muassasasining to‘liq ta’minotida bo‘lgan bola uchun ota yoki onani aliment to‘lashdan ozod qilishga yo‘l qo‘yilmasligi belgilanmoqda.

Shu bilan birga, yetim bolalar va ota-ona qaramog‘idan mahrum bo‘lgan bolalar oilaga tarbiyaga faqat ularning qarindoshlariga berilishi qoidasi joriy etilmoqda.

Senatorlarning fikricha, ushbu qonun bolalarning huquq va qonuniy manfaatlarini ishonchli himoya qilish, ta’lim muassasalarida ularning qadr-qimmati va daxlsizligini ta’minlash bo‘yicha huquqiy kafolatlarni mustahkamlashga zamin yaratadi.

Muhokama so‘nggida senatorlar qonunni ma’qullagan.

Eslatib o‘tamiz, avvalroq O‘zbekistonda bolalarni mashina o‘rindig‘isiz tashiganlik uchun jazoni kuchaytirish taklif etilayotgani haqida xabar berilgan edi.