Дунёнинг умидлари пучга чиқди. Глобал очлик 2030 йилгача оғирлашиб бораверади

2021 йилда озиқ-овқат хавфсизлиги ҳолати яхшиланади деган умидлар амалга ошмади, дунё 2030 йилгача Барқарор ривожланишнинг иккинчи мақсадига эришишдан анча узоқлашди. Бу ҳақда Бирлашган Миллатлар Ташкилотининг Озиқ-овқат ва қишлоқ хўжалиги ташкилоти, Қишлоқ хўжалигини ривожлантириш халқаро жамғармаси, UNICEF, Жаҳон озиқ-овқат дастури ва ЖССТ томонидан тайёрланган “Дунёда озиқ-овқат хавфсизлиги ва озиқланиш ҳолати – 2022” БМТ ҳисоботининг қисқача шарҳида айтилади.  

Шарҳда қайд этилишича, коронавирус пандемияси билан боғлиқ инқироз тезроқ тугайди ва озиқ-овқат хавфсизлиги соҳасидаги вазият 2021 йилда яна яхшилана бошлайди, деган умидлар амалга ошмади. 

“2020 йилда COVID-19 пандемияси даврида очлик кескин ошганидан сўнг, ўсиш 2021 йилда давом этди. Пандемиянинг нотекис таъсири ва тикланиш суръатлари, шунингдек, ижтимоий ҳимоя чораларининг чекланганлиги ва қисқа муддатлилиги тенгсизликни кучайтирди ва дунёни 2021 йилда 2030 йилги очлик мақсадидан олдингига қараганда анча узоқлаштирди”, дейилади ҳужжатда. 

Шарҳга кўра, 2021 йилда глобал очлик ўсишда давом этди, бу мамлакатлар ўртасида ва давлатлар ичида ўсиб бораётган тенгсизликни акс эттиради.  

“2015 йилдан бери тахминан бир хил бўлиб қолган тўйиб овқатланмасликнинг тарқалиши 2019-2020 йиллар оралиғида 8,0 фоиздан 9,3 фоизгача ўсди. 2021 йилда бу кўрсаткич секинроқ бўлса-да, ўсишда давом этди ва 9,8 фоизга етди", дейилади таҳлилда. 

Шунингдек, ҳужжатда 2021 йилда дунёда 702 миллиондан 828 миллионгача оч одам борлиги қайд этилган. 

“Ўртача прогноз диапазонига (768 миллион) асосланиб, 2021 йилда очликдан 2020 йилга нисбатан 46 миллион киши кўп азият чекди. Бу COVID-19 пандемияси бошланишидан олдин – 2019 йилга нисбатан жами 150 миллион кишига кўп", дейилади шарҳда. 

Бундан ташқари, таъкидланишича, 2020 йилда ўртача ёки жиддий озиқ-овқат хавфсизлигининг тарқалиши кескин ошган. Шунингдек, 2021 йилда 2,3 миллиард одам ўртача ёки оғир озиқ-овқат таъминотидан маҳрум бўлганлиги айтилади. 

Тадқиқотда соғлом овқатланиш масаласига ҳам эътибор қаратилган. Шундай қилиб, 2020 йилда деярли 3,1 миллиард одам соғлом овқатланиш имкониятига эга эмас эди, бу 2019 йилга нисбатан 112 миллион кишига кўпдир.  

"Булар асосан Осиё мамлакатлари аҳолиси бўлиб, уларда соғлом овқатланиш иқтисодий жиҳатдан қулай бўлмаганлар сони 78 миллион кишига кўпайган. Бу кўрсаткичнинг ўсиши бўйича Африка (25 миллион киши) кейинги ўринда туради”, дейилади ҳужжатда.