Депай Бразилияда футбол қоидаси ўзгаришига сабаб бўлди (видео)

Нидерландия терма жамоаси ҳужумчиси Мемфис Депай Бразилия чемпионати регламентида ўзгариш қилинишига сабаб бўлди. Бу ҳақда Бразилия футбол федерацияси матбуот хизмати хабар берди.

“Коринтианс”да ўйнаётган футболчи “Палмейрас”га қарши ўйинда рақибларини ғазаблантирди. Ўйин охирига келиб Депай икки оёғи билан тўп устига чиқди. Депайнинг хатти-ҳаракатлари майдонда тартибсизликларни келтириб чиқарди, бу эса жанжал ва ҳатто баъзи ўйинчиларнинг қизил карточкаларига сабаб бўлди.

Ўйиндан кўп ўтмай, расмийлар бундан буён бундай ғалати ишлар футболчиларга сариқ карточка кўрсатилиши билан якунланишини эълон қилди. Қоидаларга тегишли ўзгартиришлар киритилди.

Март ойи охирида бу жамоалар икки ўйиндан иборат финалда тўқнаш келди. Биринчи ўйин “Коринтианс”нинг 1:0 ҳисобидаги ғалабаси билан якунланган бўлса, такрорий ўйин голсиз дуранг (0:0) билан якунланди.

Депайнинг ўзи ҳолат бўйича эътирозини билдирди.

“Мен Бразилияга чиройли футбол кўрсатиш учун келганман, лекин кеча Бразилия футбол федерацияси ҳеч бир футболчи тўпга чиқмаслиги кераклигини эълон қилди. Бу гўзал футбол мамлакатининг келажагини ким ҳал қилади? Бундай бемаъни қоидалар ўрнига, қандай қоидалар спортни яхшилаши мумкинлигига эътибор бериш керак”, дейди Депай.

Депайнинг бу позициясини бразилиялик таниқли футболчи Неймар ҳам қўллаб-қувватлади.

“Футбол борган сари зерикарли бўлиб бормоқда” дейди Неймар.

31 ёшли Мемфис Депай фаолияти давомида ПСВ, “Манчестер Юнайтед”, “Лион”, “Барселона” ва “Атлетико Мадрид” клубларида ҳам ўйнаган. У “Лион” сафида энг кўп ўйин ўтказган – 178 та ўйин ва 76 та гол. Депай 2013 йилда Нидерландия терма жамоасида дебют қилган ва унинг ҳисобида 100 та ўйин ва 47 та гол бор.