Денгизга қулаб тушган самолётнинг “қора қутиси” олиб чиқилди

Индонезия денгиз флоти ғаввослари Ява денгизининг тубидан “Sriwijaya Air” авиакомпаниясининг 9 январь куни қулаб тушган самолётнинг “қора қутисини” олиб чиқди. Бу ҳақда Detik нашри хабар бермоқда.

Парвоз ёзувчиси Шимолий Жакарта портига олиб борилган ва у ерда журналистларга кўрсатилган. Кадрларда сув билан тўлдирилган шаффоф идиш, унинг ичида тўқ сариқ рангли “қора қути” корпуси борлиги тасвирланган.

Аввалроқ авиаҳалокат содир бўлган жойда ишлайдиган қидирув гуруҳлари ўзини ўзи ёзувчи қурилманинг радио маёқ сигналини ушлаган. Кейинчалик, қидирув операциялари қўмондони Хади Тьяджантонинг таъкидлашича, ғаввослар маёқни биринчи бўлиб пайқаган. Кейин унинг пастки қисмида мослама топилган.

“Қора қути” авиаҳалокатни текшираётган Миллий транспорт хавфсизлиги қўмитасига ўтказилади.

Boeing 737-524 Жакартадан Калимантан оролидаги Понтианак шаҳрига йўл олган эди. У парвоздан бир неча дақиқа ўтгач, радар экранларидан ғойиб бўлган. Бироз вақт ўтгач, Индонезия расмийлари лайнер Ява денгизида қулаб тушгани ҳақида хабар берган.

Бортда 62 киши, жумладан, ўн нафар экипаж аъзолари бўлган. Уларнинг барчаси вафот этган. Самолётда чет элликлар бўлмаган. Ҳалокат содир бўлган жойга етиб келган қутқарувчилар лайнер қолдиқлари, жабрланганларнинг тана қисмлари ва шахсий буюмларини топди.