Давлат Думаси Қримнинг Украина ССР таркибига ўтказилишини ноқонуний деб тан олмоқчи

Россия Давлат Думасига 1954 йилда Қримни РСФСР таркибидан Украина ССР таркибига ўтказиш тўғрисида қабул қилинган қарорни бекор қилувчи қонун лойиҳаси киритилди. Бу ҳақдаги тегишли ҳужжат кеча, 11 март куни Дума маълумотлар базасида пайдо бўлди. 

Қонун лойиҳаси муаллифлари “Ягона Россия” партиясининг икки вакили – депутат Константин Затулин ва Федерация кенгаши аъзоси Сергей Цековдир. Улар Қримнинг Украина ССР таркибига ўтказилишини ноқонуний, шунингдек, қонун устуворлиги ва халқаро ҳуқуқнинг асосий тамойилларига мос келмайдиган деб тан олишни ҳамда тегишли қарорни "конституцияларни бузган ҳолда" қабул қилинган "сиёсий жиноят" деб эълон қилишни таклиф қилмоқда. 

Қайд этиш жоизки, Затулин сўнгги етти йил ичида учинчи марта Қримнинг Украинага ўтказилишини ҳақиқий эмас деб тан олишни таклиф қилган. Охирги марта у буни 2024 йилнинг февралида қилган.

СССР парчаланганидан кейин Россия Украинанинг ҳудудий яхлитлигини тан олганига қарамай, Россия Федерацияси 2014 йилда Украинанинг Қрим ярим оролини аннексия қилди. Бунга жавобан Ғарб Москвага қарши иқтисодий санкциялар киритди. Дунёнинг деярли барча давлатлари ҳали ҳам Қримни Украинанинг бир қисми деб билади. Украина ҳукумати мамлакатнинг барча ҳудудларини 1991 йил чегаралари доирасида қайтариш мақсадини эълон қилди.