Дания Украинага F-16 билан Россияга зарба беришга рухсат беради

Украина Даниядан оладиган F-16 қирувчи самолётларидан Россия ичидаги ҳарбий нишонларга зарба бериш учун фойдаланиши мумкин. Бу ҳақда қироллик Ташқи ишлар вазири Ларс Локке Расмуссен маълум қилди.

Унинг тушунтиришича, бу Дания учун янги позиция эмас.

“Буни Дания парламентида Ташқи ишлар қўмитамиз билан муҳокама қилганимизда, биз бошиданоқ бу ўз-ўзини ҳимоя қилишнинг бир қисми эканлигини, шу сабабли тажовузкор давлат ҳудудидаги ҳарбий объектларга ҳам ҳужум қилиш мумкинлигини айтдик”, деган Расмуссен.

Бир неча кун аввал Бельгия Бош вазири Александр Де Кроо Украина Қуролли кучларининг ўз мамлакатидан олинган қирувчи самолётларидан фақат ўз ҳудудида фойдаланиш мумкинлигини айтганди. Бельгия ҳукумати, шунингдек, 2028 йилгача Украинага жами 30 та F-16 қирувчи самолётини топширишни режалаштирмоқда.

Дания 2023 йилда Украинага 19 та F-16 қирувчи самолётини етказиб беришга ваъда берди. 2024 йил 14 май куни Бош вазир Метте Фредериксен қирувчи самолётлар бир ой ичида Украинага топширилишини айтганди.

29 май куни Украина Президенти девони раҳбари маслаҳатчиси Михаил Подоляк Россиянинг Харьковга ҳужумидан сўнг фронт чизиғи кучайгани сабабли мамлакат қирувчи самолётлар етказиб беришга жуда муҳтожлигини айтди. Унинг сўзларига кўра, фронт чизиғини ҳимоя қилиш учун камида 60 та қирувчи самолёт, оптимал ҳолатда эса 100-120 та қирувчи самолёт керак бўлади. Шунингдек, унинг қўшимча қилишича, Россия чегараси ҳудудига зарбалар бермаслик учун рухсат керак.

Умуман олганда, Украина Бельгия, Дания, Нидерландия ва Норвегиядан 60 дан ортиқ F-16 қирувчиларини қабул қилиши керак. Ўтган ҳафта АҚШ Миллий гвардияси вакили украиналик учувчилар F-16'да учиш бўйича машғулотларни август ойида якунлашини айтган эди. Самолётларни етказиб бериш фақат учувчиларни тайёрлаш тугагандан сўнг кутилмоқда.

Эслатиб ўтамиз, олдинроқ АҚШ Президенти Жо Байден Киевга Россия ҳудудини ўққа тутиш учун Америка қуролларидан фойдаланишга яширин рухсат бергани хабар қилинганди.