Дания терма жамоасининг собиқ мураббийи вафот этди

Норвегиялик таниқли футбол мураббийи, Дания терма жамоасининг собиқ бош устози Оге Харейде мия саратони билан қисқа муддатли курашдан сўнг 72 ёшида вафот этди. Бу ҳақда “Ni news” нашри хабар берди.

Оге Харейдега жорий йилнинг июль ойида мия саратони ташхиси қўйилган эди. Унинг касаллиги фақат ноябрь ойида жамоатчиликка маълум бўлган. Шундан сўнг у ўғлининг ёрдами билан соғлиғи оғир аҳволда эканини очиқ тан олган эди.

Харейде 2016–2020 йилларда Дания терма жамоасини бошқарган. У Мортен Ольсеннинг ўрнини эгаллаб, нисбатан прагматик ўйин услуби билан Данияни 2018 йил Россияда ўтказилган Жаҳон чемпионатига олиб чиққан. Шунингдек, у Дания терма жамоасини Евро-2020 турнирига ҳам йўлланма билан таъминлаган. Бироқ коронавирус пандемияси сабаб мусобақа 2021 йилга кўчирилгани туфайли у финал босқичида жамоани бошқара олмаган.

Оге Харейде Дания терма жамоаси билан 40 та халқаро учрашувда атиги уч мағлубият қайд этган.

Маълумот учун, қарийб 40 йиллик мураббийлик фаолияти давомида Оге Харейде Дания Суперлигасининг “Брондбю” клубида ҳам ишлаган. Бироқ 2002 йил баҳорида рафиқасига саратон ташхиси қўйилгач, у лавозимини тарк этишга мажбур бўлган.

Шунингдек, у Норвегия ва Исландия терма жамоаларида, клублар даражасида эса Норвегиянинг “Молде”, “Викинг”, “Русенборг”, Швециянинг “Ҳельсингборг”, “Мальмё” ва “Эргрюте” жамоаларида мураббийлик қилган.

Эслатиб ўтамиз, аввалроқ Сербиянинг “Раднички 1923” жамоаси бош мураббийи, 44 ёшли босниялик мутахассис Младен Жижович миллий чемпионат доирасидаги “Младост Лучани”га қарши ўйин давомида юрак хуружидан вафот этган эди.