Дам олиш кунлари қаерларда ёмғир ёғиши айтилди

Жорий йилнинг 18-19 сентябрь кунлари Ўзбекистон ҳудуди бўйича асосан кам булутли ва илиқ об-ҳаво сақланиб туради. Бу ҳақда Ўзгидромет хабар берди.

Унга кўра, ҳаво ҳарорати кечалари 17-20 даража, кундуз кунлари 31-34 даража атрофида, жанубда ва чўл ҳудудларда 35-37 даражагача бўлиши кутилмоқда, бу сентябрь ойининг иккинчи ярми учун бўлган иқлимий меъёрдан 2-4 даражага юқоридир.

Жорий йилнинг 20 сентябрь куни Ўзбекистон ҳудуди бўйича, жанубий вилоятлардан ташқари, булутлилик кучайиши ва кундузги ҳарорат 2-3 даражага пасайиши кутилмоқда. Қисқа муддатли ёмғир фақат Наманган ва Фарғона вилоятлари тоғли ҳудудларининг баъзи жойларида ёғиши мумкин.

Республиканинг чўл зонасида ва тоғли ҳудудларида 20 сентябрь куни шамол тезлиги 13-18 м/с гача кучайиши, айрим жойларда чанг-тўзонлар билан кузатилиши мумкин.

Тошкентда ҳаво бироз булутли, вақти-вақти билан ўзгарувчан бўлади, ёғингарчилик кутилмайди. Ҳарорат кечалари 18-20 даража, кундузи 18-19 сентябрда 32-34 даража, 20 сентябрда 30-32 даража бўлади. Шамол шарқдан 3-8 м/с тезликда эсади.

Эслатиб ўтамиз, эртага, 19 сентябрь куни Ўзбекистонда ҳаво бироз булутли бўлиши, шунингдек, ҳарорат 37 даражагача кўтарилиши ҳақида хабар берилган эди.