CNN ва AFP мухбирлари Донбассда ўққа тутилди

north_east

Россия Укрaинага ҳужум қилишга жиддий тайёрланмоқда - НАТО Бош котиби

АҚШнинг CNN ва Франциянинг “Agence France Presse” (AFP) телеканали журналистлари кеча, 19 февраль куни Донбассда фронт бўйлаб Украина Ички ишлар вазири Денис Монастирскийга ҳамроҳлик қилаётган пайтда ўққа тутилган.

Шундан сўнг, кеча Украина Президентини қўллаб-қувватловчи “Халқ хизматчиси” партияси вакили Юлия Палийчук ҳам Донбассда Украина парламенти аъзолари ва хорижлик журналистлар ўққа тутилганини маълум қилган.

“Бир гуруҳ журналистлар, жумладан, CNN ва Франциянинг AFP телеканали журналистлари шанба куни фронт чизиғи бўйлаб Украина Ички ишлар вазирига ҳамроҳлик қилиб кетаётганида миномётдан ўққа тутилди”, дейилади CNN телеканали ўз сайтида эълон қилган баёнотда.

Аввалроқ, “Украина-24” телеканали ўққа тутилган украиналик депутатлар ва хорижлик журналистлар жабрланмагани ҳақида хабар берган. Телеканал, шунингдек, Украина ички ишлар вазири Денис Монастирский ҳам ўққа тутилгани ҳақида маълум қилган, бироқ бу маълумот ҳозирча расман тасдиқлангани йўқ.

Бундан ташқари маълум қилинишача, кеча, 19 дан 20 февралга ўтар кечаси Украина шарқидаги Донецк (ДХР) ҳудудидан бир неча бор кучли портлаш овозлари эшитилган.

Аммо, Киев ҳам ДХР ҳам ҳужум уюштирилишида бир-бирини айбламоқда.

Эслатиб ўтамиз, Украинанинг шарқий ҳудудларида жойлашган россияпараст, ўзини суверен дея атовчи ҳудудлар - Луганск халқ республикаси (ЛХР) ва Донецк халқ республикаси (ДХР) етакчилари 18 февраль куни аҳолини Россияга эвакуация қилиш ҳақида буйруқ берган. 

Украина таркибидан ажралиб чиқиш ҳаракатидан бўлган икки ҳудуд жорий йилнинг 17 февраль куни Украина ҳарбийлари Донбассга ҳужум қилганини рўкач қилиб, Киевни айбламоқда. Аммо, расмий Киев ЛХР ва ДХР томонидан Украина ҳудудига 60 маротаба ўқ узилганини айтмоқда. Ҳатто, баъзи ҳужумлар оғир артиллериялар ёрдамида уюштирилгани маълум қилинмоқда.