ChatGPT’да “руҳиятга таъсир кўрсатмайдиган” янги функция яратилди

OpenAI ўзининг ChatGPT сунъий интеллект чат-боти учун боланинг руҳий ҳолати ёмонлашганида ота-онани хабардор қилиш каби янги назорат функциясини эълон қилди. Аммо танқидчилар буни “ноаниқ ваъда” деб атамоқда. Бу ҳақда “Euronews” хабар беради.

Бу қарор жорий йилнинг апрель ойида ўз жонига қасд қилган 16 ёшли Адам Рейннинг ота-онаси томонидан компания ва унинг бош директори Сам Алтманга қарши даъво қўзғатилганидан кейин амалга оширилган.

Ота-оналарнинг фикрича, ChatGPT Адам Рейнда психологик қарамликни келтириб чиқарган ва ҳатто унга ўз жонига қасд қилиш тўғрисидаги хатни ҳам ёзиб берган.

OpenAI’нинг ёзишича, янги ота-она назорат тизими октябрь ойида жорий этилади. Ушбу тизим ота-оналарга ўз ҳисобини фарзандининг ҳисоби билан боғлаш имконини беради. Бунга ChatGPT чат-ботидаги суҳбатлар тарихи ва сунъий интеллект автоматик равишда сақлаб қоладиган маълумотлар киради.

OpenAI ўз блогида, агар ўсмирда психологик стресс ҳолати кузатилса, дарҳол унинг ота-онаcига хабарнома юборишини ёзган. Бироқ компания бундай огоҳлантиришга нима сабаб бўлишини аниқ қайд этмади. Бу функция мутахассислар томонидан бошқарилиши мумкин. 

“Бу яхшироқ ишлашга берилган ноаниқ ваъдалар. OpenAI инқирозга юз тутмаслик учун мавзуни ўзгартиришга уринмоқда” , деган ўсмир ота-онасининг адвокати, Жай Эделсон

Эслатиб ўтамиз, аввалроқ ChatGPT каби сунъий интеллектга асосланган чат-ботлар билан мулоқот баъзи фойдаланувчиларда реал ҳақиқатни қабул қилишда оғир бузилишларга олиб келаётгани хабар қилинган эди.

Маликабону Муҳаммедова