Чарльз Оливейра “истеъфо”даги Ҳабиб билан жанг қилмоқчи

Енгил вазн тоифасида собиқ UFC чемпиони бразилиялик Чарльз Оливейра Ислом Махачевнинг мағлуб этганидан сўнг, Ҳабиб Нурмуҳамедов қасос олиш учун спортга қайтса, у билан жанг қилишга тайёр. Бу ҳақда “BJPenn” нашри ёзмоқда.

"Махачев билан жанг менинг фаолиятимдаги энг қийини эмас. Ислом Ҳабибнинг давомчиси ва у бу юкни елкасида кўтаради. Мен учун эса бу шунчаки жанг. Мен жангларни бир-биридан ажратмайман. Бу Исломга қарши кураш, лекин агар Ҳабиб қайтиб келиб, қасос олмоқчи бўлса, мен у билан уришишга тайёрман. Лекин у қайтиб келади, деб ўйламайман. Ҳабибнинг қарорини тўлиқ ҳурмат қиламан.

Мен Махачев билан жангда дунёни ҳайратда қолдираман. Мен жангни биринчи раундда якунлайман. Ўзимнинг маҳоратим билан уники ўртасидаги фарқни, рақибларимнинг савияси ва унинг рақибларининг савиясидаги тафовутни кўрсатаман. Шундан сўнг, одамлар нима учун чемпионнинг исми Чарльз Оливейра деб аталишини тушунади. Мен ҳали ҳам Конор Макгрегор билан жанг қилишни хоҳлайман. У аҳмоқ эмас, бундан ташқари у ақлли одамлар билан маслаҳатлашади. У одамларни ҳаяжонга солади ва жангларни сотишни билади”, дейди Оливейра.

Қайд этиш керакки, бразилиялик жангчи Конор билан тўқнашиш ҳақида тез-тез гапиради. Конор Магрегор кетма-кет мағлубиятларига  қарамай, кўпчилик жангчиларнинг орзуси бўлиб қолмоқда. Сабаби UFC 'да Конордан кучлироқ жангчилар бўлган ва улар ҳозир ҳам бор. Лекин UFC'га ҳали ҳеч ким ирландиялик жангчи каби катта пул олиб келмаган.

Эслатиб ўтамиз, жорий йилнинг май ойида бўлиб ўтган UFC 274 мусобақасидаги сўнгги жанги олдидан Оливейра ортиқча вазн муаммосига дуч келди ва шу сабабли чемпионлик унвонидан маҳрум қилинди. Унинг рақиби америкалик Жастин Гетжи вазн лимитини бажарган бўлса-да, Оливейрани мағлуб қила олмади. Шу сабабли чемпионлик камари вакант қолганди. 

Махачев эса узоқ давом этган ғалабали сериядан сўнг, чемпионлик унвонига даъвогар позициясига кўтарилди. UFC Fight Night 202 турниридаги сўнгги жангида Ислом америкалик Бобби Гринни биринчи раунддаёқ техник нокаут билан мағлуб этганди.

Маълумот учун, бразилиялик Чарлз Оливейра ва россиялик Ислом Махачев ўртасидаги вакант чемпионлик учун баҳс жорий йилнинг 22 октябрь куни Абу-Дабидаги UFC 280 мусобақаси доирасида бўлиб ўтади. Бу жанг ғолиби енгил вазн тоифасида UFC чемпионига айланади.