Буюк Британиянинг Эрондаги элчихонаси вақтинча ёпилди

Буюк Британия ҳукумати кеча, 14 январь куни Теҳрондаги элчихонаси фаолиятини вақтинча тўхтатди.  Бу ҳақда “Reuters” нашри хабар берди.  

Қайд этилишича, Эронда кузатилаётган тартибсизликлар ортидан Британия ушбу мамлакатдаги элчихонасини вақтинча ёпган ва эндиликда “онлайн” ишламоқда. 

“Биз Буюк Британиянинг Теҳрондаги элчихонасини вақтинча ёпдик. Эндиликда элчихона масофадан туриб фаолият юритади. Ташқи ишлар вазирлигининг саёҳат бўйича тавсиялари ушбу консуллик ўзгаришини инобатга олган ҳолда янгиланди”, деган ҳукумат вакили. 

Британия расмийсига кўра, мамлакатнинг Эрондаги элчиси ва барча консуллик ходимлари хавфсизлик нуқтаи назаридан зудлик билан эвакуация қилинган. Қарор ходимлар хавфсизлигини устувор деб билган ҳолда қабул қилинган. 

Бу қарор Эрон раҳбарияти Ислом Республикаси тарихидаги энг жиддий ички тартибсизликларни бостиришга уринаётган бир пайтда ва АҚШ Президенти Дональд Трамп ҳарбий аралашув билан таҳдид қилаётган шароитда қабул қилинган. 

Шунингдек, Британия ва АҚШ Яқин Шарқдаги айрим ҳарбий базалардан ҳарбийларининг бир қисмини олиб чиққан.
Бунга сабаб сифатида Эроннинг юқори мартабали расмийси агар АҚШ Ислом Республикасига зарба берса, Теҳрон қўшни давлатларга тегишли Америка базаларига ҳужум қилиши мумкинлиги ҳақида огоҳлантирганини айтган.

Эслатиб ўтамиз, кеча, 14 январь куни айнан “Reuters” нашри АҚШ яқин 24 соат ичида Эронга зарба йўллаши мумкинлиги ҳақида хабар берган эди.