Буюк Британия Украинадан 2023 йилда ҳал қилувчи ғалабани кутмоқда – Сунак 

Британия Украина 2023 йилда Россия кучлари устидан ҳал қилувчи ғалабани қўлга киритишини кутмоқда. Бу ҳақда бугун, 8 февраль куни Буюк Британия Бош вазири Риши Сунак Британия парламентининг Жамоатчилик палатасида сўзлаган нутқида маълум қилди.

“Мен палатани ишонтириб айтмоқчиманки, биз Украинани бу йил жанг майдонида иродали ғалабага эришиши учун қўллаб-қувватлашда давом этамиз”, деди ҳукумат раҳбари.

Шунингдек, у Буюк Британия Украина Қуролли Кучлари учувчиларини НАТОга тегишли қирувчи самолётларни бошқаришга ўргатиш ниятида эканини маълум қилди. Қиролликда Украина Қуролли Кучлари жангчиларини тайёрлаш дастурининг кенгайтирилиши Украина Президенти Владимир Зеленскийнинг Лондонга ташрифи билан боғлиқ бўлиб, у тез орада Британия парламенти аъзолари олдида нутқ сўзлайди.

Парламент аъзолари билан ҳафталик суҳбатларида Сунак қиролликнинг мудофаа бюджетини собиқ бош вазир Борис Жонсон томонидан тасдиқланган миқдордан кўпроқ ошириш ниятидами ё йўқ, бунга аниқлик киритмаган.

Эслатиб ўтамиз, Украина Президент Владимир Зеленский уруш бошлангандан буён иккинчи ташрифини Буюк Британияга амалга оширди. У бугун, 8 февраль куни ҳарбий самолётда Лондонга етиб борди.

Алибек Бейжанов