Бўстонлиқда ноқонуний қурилган объектларга қарши рейдлар бошланди

Чирчиқ дарёси қирғоқларининг катта қисми бугунги кунда Чимён-Чорвоқ курорт зонасига киради ва у ерда ноқонуний қурилган иншоотлар ҳам талайгина. У ердаги дала ҳовлиларидан баъзиларининг атрофи шахсий соҳилга эга бўлиш мақсадида тўсиқлар билан беркитилган. Бу эса қолган фуқароларнинг сувга чиқишига тўсқинлик қилади.

Шу сабабдан Давлат экология қўмитаси томонидан Ўзбекистон Республикасининг “Табиатни муҳофаза қилиш тўғрисида”, “Экологик назорат тўғрисида” ва “Сув ва сувдан фойдаланиш” қонунлари асосида Бўстонлиқ туристик зонасида тезкор рейд тадбирлари ўтказилмоқда. Бу ҳақда ЎзА хабар берди.

Шундан ўтказилган рейд тадбирларидан бирида 39 та корхона ва 120 дан ортиқ хонадон кўздан кечирилди. Уларнинг барчасига ноқонуний қурилмаларни олиб ташлаш бўйича огоҳлантириш хатлари берилди ҳамда тегишли тартибда тушунтириш хатлари олинди. Шу билан бирга, маъмурий жавобгарликка тортилиш бўйича огоҳлантирилди.

Сув ёқасида қонун-қоидаларга риоя қилмасдан қурилган савдо расталари, хизмат кўрсатиш шохобчалари ҳам бошқа жойларга кўчирилмоқда.