Бухородаги савдо мажмуасида ёнғин чиқди

Бухоро вилояти Ғиждивон туманидаги савдо мажмуасида ёнғин содир бўлди. Бу ҳақда Фавқулодда вазиятлар вазирлиги хабар берди.

Қайд этилишича, бугун, 7 январь куни соат 05:20 да Ғиждивон тумани Дегрезон кўчасида жойлашган савдо мажмуасида ёнғин содир бўлаётганлиги тўғрисида туман Фавқулодда вазиятлар бўлимига хабар келиб тушган.

Чақирувга кўра, 8 та ёнғин-қутқарув экипажи соат 05:23 да воқеа жойига етиб бориб, ёнғин соат 05:45 да қуршаб олинган ва 07:50 да тўлиқ бартараф этилган.

Дастлабки маълумотларга кўра, савдо мажмуасининг тахминан 250 квадрат метр майдонида ички қисми ва маҳсулотлари ёнган. Ёнғин оқибатида ҳеч ким тан жароҳати олмаган ва ҳалок бўлмаган.

Мазкур ҳолат юзасидан воқеа жойига вилоят ФВБ раҳбарияти ҳамда туман ФВБ раҳбар ходимлари етиб борган.

Аввалроқ, Бухородаги ўқув маркази биносида портлаш содир бўлгани ҳамда Тошкентда корхона цехи ёниб кетгани ҳақида хабар берилган эди.

Озода Чориева