Buxoroda kuchli bo‘ron: 7 kishi jarohatlandi

Buxoroda kecha, 27 aprel kuni kech soatlarda ro‘y bergan kuchli shamol oqibatida 7 kishi jarohatlandi. Bu haqda O‘zbekiston Respublikasi Favqulodda vaziyatlar vazirligi xabar bermoqda. 

O‘zbekiston Respublikasi Vazirlar Mahkamasi huzuridagi Gidrometeorologiya xizmati Markazining 27 aprel kuni soat 20:30 da taqdim etgan ma’lumotiga ko‘ra, Buxoro viloyatining bir qator tumanlarida janubiy-g‘arbiy yo‘nalishda 15-25 m/s (54-90 km/soat) tezlikda kuchli shamol esishi natijasida ijtimoiy soha ob’ektlariga, aholi yashash xonadonlariga va hududdagi daraxtlarning ag‘darilishi natijasida avtotrasport vositalariga zarar yetgan. Shuningdek 7 nafar fuqaro turli darajadagi tan jarohati  olgan.

Kuchli shamol Toshkent shahri va viloyatida ham kuzatilish ehtimoli mavjud. Shu munosabat Toshkent  shahar hokimligi poytaxtliklarga ogohlantirish bilan chiqdi. Unda shunday deyiladi:

“28 aprel kun davomida poytaxtimizda kuchli shamol  kutilmoqda, 12-17m/s. Bu esa o‘z navbatida daraxt va ularning shoxlarini sinishiga sabab bo‘lib, uning ostida va yaqinida turgan avtomobillarga zarar yetkazishi mumkin.

Shu sababli avtomobillaringizni daraxtlardan uzoqroq, xavfsiz joyga qo‘yishingizni iltimos qilamiz”.