Бугун Абдусатторов ва Синдоров қатнашаётган нуфузли турнир якунланади

Бугун, 14 февраль куни Германиянинг Вайссенхаус шаҳрида давом этаётган шахмат бўйича нуфузли “Freestyle Chess Grand Slam” турнири якунланади.

Мусобақа стартидаёқ шов-шувли натижаларни кўрсатган ўзбекистонлик гроссмейстер Жавоҳир Синдоров бугун 3-ўрин учун  кечадиган баҳснинг иккинчи партиясида норвегиялик таниқли шахматчи Магнус Карлсенга қарши дона суради. Томонлар ўртасидаги биринчи баҳсда норвегиялик гроссмейстернинг қўли баланд келди. Синдоров фақатгина ғалаба қозониш орқали ўтинни тай-брекка олиб ўтиши ва тай-брекда ҳам зафар қучиб, мусобақани кучли учликда якунлаши мумкин.

Яна бир ўзбекистонлик гроссмейстер Нодирбек Абдусатторов мусобақанинг 5-ўрини учун америкалик Ҳикару Накамура ҳам баҳс олиб боради. Абдусатторов ҳам худди Синдоров сингари 1-партияда рақибига мағлубиятга учради. Нодирбекни ҳам Накамурага қарши баҳсда фақатгина ғалаба қониқтиради.

Маълумот учун, “Freestyle Chess Grand Slam” турнирида 3-ўринни қўлга киритган шахматчи 100 минг, 5-ўрин эгаси эса 50 минг АҚШ доллар пул мукофотига эга чиқади. Мусобақанинг жавоб ўйинлари Тошкент вақти билан соат 17:00 да бошланади.