Бугун Ҳусанов ва “Сити” “Кристал Пелас”ни меҳмон қилади

Бугун Англия Премьер-лигаси 32-туридан ўрин олган “Манчестер Сити” ўз уйида “Кристал Пелас”ни қабул қилади. Ушбу ўйинда “шаҳарликлар” сафида ўзбекистонлик ҳимоячи Абдуқодир Ҳусанов асосий таркибда тушиши кутилмоқда.

ЕЧЛ учун курашаётган “Сити”

Омадсиз мавсумни бошдан кечираётган “шаҳарликлар” чемпионлик учун эмас, балки Европа Чемпионлар лигаси йўлланмалари учун курашаётгани ҳайрон қолдиради. Ушбу йўлланмани қўлга киритиш осон бўлмайди. Чунки “Манчестер Сити” айни вақтга келиб АПЛ турнир жадвалида 52 очко жамғарган ҳолда 6-поғонада жойлашган. Энг яқин таъқибчиси “Астон Вилла” манчестерликлардан 1 очко кам тўплаган холос ва 7-ўринда бормоқда. “Манчестер Сити”дан олдинда 53 очкодан жамғарган “Ньюкасл” ва “Челси” мос равишда 5 ҳамда 4-ўринларни банд этган. Яқиндагина тарқалган хабарларга кўра, кейинги мавсумда Англиядан 5 та жамоа Европа Чемпионлар лигасида иштирок этадиган бўлди ва бу юқорида санаб ўтилган клублар учун катта мотивация бўлди.

Ҳусанов асосий таркибдан жой оладими?

Бир неча ўйиндан бери захира ўриндиғидан жой олиб келаётган ўзбекистонлик ҳимоячи Абдуқодир Ҳусанов “Кристал Пелас”га қарши майдонга тушиш эҳтимоли юқори. Чунки Ҳусановнинг захирада қолиши, унинг ўрнига тушаётган Нико О’рейли чап қанотда ўйнайди ва чап қанотдаги Йошко Гвардиол мажбуран марказий ҳимояга ўтказилган эди. Албатта, хорватиялик ҳимоячи бир неча мавсумдан бери чап қанотда ўйнамоқда ва бу позицияга анча мослашиб қолганди. Шундай экан, Ҳусановнинг марказий ҳимояга қўйилиши Гвардиолга эркинлик яратади. 

Тахминий таркиблар

Ҳар бир учрашувга бўлгани каби бир нечта порталлар “Манчестер Сити” нинг “Кристал Пелас”га қарши ўйин учун тахминий таркибларни эълон қилди.

“90 min” нашри талқинига кўра, “Манчестер Сити” таркиби.

Эдерсон, Нунес, Диаш, Ҳусанов, Гвардиол, Нико, Гюндоган, Савиньо, Фоден, Доку, Мармуш.

“One football” нашри талқинига кўра, “Манчестер Сити” таркиби.

Эдерсон, Льюис, Диаш, Ҳусанов, Гвардиол, Нико, Де Брюйне, Бернарду, Грилиш, Доку, Мармуш.

“Sportsmole” нашри талқинига кўра “Манчестер Сити” таркиби.

Эдерсон, Нунес, Диаш, О’рейли, Гвардиол, Нико, Гюндоган, Савиньо, Де Брюйне, Доку, Мармуш.

Юқоридаги икки портал ўзбекистонлик ҳимоячини асосий таркибда тахмин қилмоқда ва бу айнан Гвардиолнинг чап қанотда ўйнаши ва унга эркинлик берилиши билан боғлиқ. Албатта, асосий таркиб билан боғлиқ сўнгги қарорни мураббий Пеп Гвардиола чиқаради.

Маълумот ўрнида, “Манчестер Сити” - “Кристал Пелас” ўртасидаги ўйин бугун, 12 апрель куни Тошкент вақти билан 16:30 да старт олади.