Бугун Ҳусанов “Манчестер Сити”даги илк соврини учун ишга киришади

Англия Премьер лигасида чемпионлик пойгасидан деярли чиқиб кетган Чемпионлар лигасида ҳам “Реал”га имкониятни бой бериб, турнирни тарк этган “Манчестер Сити” бу мавсумда қўлга киритиши мумкин бўлган соврин бу Англия кубоги ҳисобланади. Гвардиола шогирдлари бугун, 1 март куни Англия кубоги 1/16 финал босқичида ўз уйида “Плимут”ни қабул қилади. Ушбу жамоа 1/32 финал босқичида катта шов-шув кўтарган клуб ҳисобланади. Сабаби “Плимут” ушбу босқичда Англия Премьер-лигаси пешқадами “Ливерпуль”ни турнирдан чиқариб юборган.

Ҳусанов асосий таркибда тушадими?

Сўнгги ўйинларда мухлис ва мутахассислар ишончини қозониб келаётган ўзбекистонлик футболчи Абдуқодир Ҳусанов мураббий Гвардиоланинг ҳам ишончига кириб олган. Жамоа мағлуб бўлган ўйинларда ҳам Ҳусанов клубининг энг яхши футболчиларидан бири бўлди. Унинг тезлиги, елкама-елка курашлардаги кескинлиги, ўта кескин, аммо фолсиз “подкат”лари жамоага фойда келтирса келтирди, лекин зарар қилмади.

Шунингдек, Ҳусанов ҳимоянинг исталган позициясида бирдек ўйнай олишини ҳам исботлаб келмоқда. У Чемпионлар лигаси доирасида “Реал”га қарши ўйинда ўнг қанот ҳимоядан ўрин олди ва Винисиусни анча қийнади. Бразилиялик билан тезликда ҳам куч синашишга улгурди.

Марказий ҳимояда ҳам у анча ишончли ўйин намойиш этмоқда. Ҳаттоки “Челси”га қарши омадсиз дебютида ҳам у ўйин давомида қилган хатосини бир неча марта ювишга улгурди. Ҳимоядаги йўқотишлар фонида Абдуқодир Ҳусанов ишончли ўйин намойиш этаётгани Гвардиоланинг омади. Чунки “Манчестер Сити”нинг асосий ҳимоячилари Мануэль Аканжи ва Жон Стоунз узоқ муддатга сафдан чиқди. Ҳусанов эса уларнинг йўқлигини максимал билинтирмасликка ҳаракат қилмоқда.

Тахминий таркиблар

Одатга кўра, ҳар ўйиндан олдин ўзининг тахминий таркибларини эълон қиладиган “Sporting News”, “One Football”, “90 Min” нашрлари “Манчестер Сити” - “Плимут” учрашуви учун ҳам ўз тахминларини билдирди.

“Sporting News” талқинига кўра тахминий таркиблар.

“Манчестер Сити”: Ортега, Льюис, Рейс, Аке, О'рейли, Бернарду, Гюндоган, Макэти, Де Брюйне, Грилиш, Холанд.

“One Football” талқинига кўра тахминий таркиблар.

“Манчестер Сити”: Ортега, Льюис, Рейс, Диаш, О'рейли, Нико, Савиньо, Макэти, Де Брюйне, Грилиш, Холанд.

“90 Min” талқинига кўра тахминий таркиблар.

“Манчестер Сити”: Ортега, Льюис, Рейс, Аке, О'рейли, Бернарду, Гюндоган, Фоден, Де Брюйне, Грилиш, Мармуш.

Юқоридаги 3 та нашр ҳам ўзбекистонлик ҳимоячи Абдуқодир Ҳусановни асосий таркибга киритмаган. Унинг ўрнига ҳимоя марказига бразилиялик футболчи Витор Рейс танланган. Буни эса шунча қийин ўйинлардан кейин Ҳусановга дам берилиши керак деб тушунса бўлади. Шу билан Гвардиола Витор Рейснинг потенциали қанчалик юқори эканлигини билиб олиши мумкин.

Маълумот ўрнида, “Манчестер Сити” - “Плимут” ўйини бугун, 1 март куни 22:45 да старт олади.