“Бу кулгили”. Месси FIFA ҳақидаги баҳсларга кескин жавоб қайтарди

Аргентина терма жамоаси сардори Лионель Месси 2026 йилги Жаҳон чемпионати ярим финалидан кейин FIFA ва ҳакамлар томонидан жамоага алоҳида имтиёз берилаётгани ҳақидаги айбловларни инкор этди. Бу ҳақда у Англия билан ўйиндан кейин журналистларга берган интервьюсида сўз очди.

“Эришган барча ютуқларимизни шубҳа остига қўйиш кулгили. Биз кетма-кет бешинчи финалга ва кетма-кет иккинчи марта Жаҳон чемпионати финалига чиқдик. Бунинг ўзи жамоамизнинг қандай савияга эга эканини кўрсатади. Сўнгги йилларда биз дунёнинг энг яхши терма жамоаси бўлдик. Ким нима деса ҳам, бизга ҳеч ким ҳеч нарса совға қилмади. Бизда бор ҳамма нарсани футбол майдонида ҳалол меҳнат билан қўлга киритдик”, дейди Месси.

Ярим финалда Аргентина Англияни 2:1 ҳисобида мағлуб этиб, кетма-кет иккинчи марта Жаҳон чемпионати финалига йўл олди. Месси учрашувда икки голли узатмани амалга оширди ва баҳснинг энг яхши футболчиси деб топилди.

Аввалроқ, интернетда Аргентина терма жамоасини турнирдан четлатиш талаби илгари сурилган онлайн-петиция тарқалган эди. Муаллифлар жамоа фойдасига қабул қилинган баҳсли ҳакамлик қарорларини асос қилиб келтирган. Маълумотларга кўра, ушбу петицияни 3 миллиондан ортиқ киши имзолаган.

Петиция Аргентина иштирокидаги бир қатор учрашувлардаги баҳсли вазиятлардан сўнг пайдо бўлди. Жумладан, Мисрга қарши баҳсда (3:2) мисрликлар ўз фойдаларига пенальти белгиланмагани ва Мустафо Зиконинг голи ҳисобга олинмаганидан норози бўлган. Шундан сўнг, жамоа етакчиларидан бири турнир “сохталаштирилган”ини иддао қилган.

Шунингдек, Швейцарияга қарши чорак финал учрашувида ҳам ҳакамлик қарорлари қизғин муҳокамаларга сабаб бўлган. Шунга қарамай, амалдаги жаҳон чемпиони бўлган Аргентина ўз чемпионлик юришини давом эттирмоқда.

Аргентина жорий йилнинг 19 июль куни бўлиб ўтадиган финалда Испания терма жамоасига қарши майдонга тушади. Агар жанубий америкаликлар кетма-кет иккинчи бор жаҳон чемпиони бўлса, улар 1958 ва 1962 йилларда Пеле бошчилигида ушбу натижага эришган Бразилия терма жамоасининг рекордига тенглашади.