Бу ҳали бошланиши – Зеленский Россия бошқа давлатларга ҳам тиш қайраши мумкинлигидан огоҳлантирди

Украина Президенти Владимир Зеленский яна дунё ҳамжамиятини Россия Қуролли кучларининг ҳужумларини тўхтатишга чақирди. Бу ҳақда давлат раҳбарининг Россия қўшинлари ҳужумлари бошланганининг 30-кунида ижтимоий тармоқларда эълон қилинган видеомурожаатида айтилади. 

Украина раҳбари сўзи аввалида Россия Федерацияси Украинага шафқатсиз уруш эълон қилган кундан роппа-роса бир ой ўтганини эслатади.  

“Украина ҳеч қачон Россия Федерацияси хавфсизлигига таҳдид солмаган, ҳозир ҳам биз сизнинг ерингизга эмас, ўз еримизга, халқимизга тинчликни қайтариш учун ҳамма нарсани қиляпмиз”, дейди Зеленский. 

Украина давлати раҳбари Россия Федерацияси фуқароларига ҳам мурожаат қилди. 

“Ишончим комилки, сизнинг орангизда давлатингиз сиёсатидан нафратланганлар, телевизорда кўрган нарсангиздан, ўз тарғиботчиларингиз интернетда сизга қандай ёлғон гапираётганидан безор бўлганлар кўп. Тарғиботчилар, улар сиз тўлаган солиқлардан маош оладиган ва уруш ҳақида ёлғон гапирадиган тарғиботчилар. Бу Россиянинг барча фуқароларини қашшоқлаштирмоқда. Ҳар куни янада кўпроқ. Бу аҳмоқлик эмасми? Давлатингиз сизни камбағал қилиш, дунёдан ажратиб қўйиш, сизни бошқаришни осонлаштириш, ўлимга, урушга юбориш учун сиздан солиқ йиғадими?”, дейди Зеленский. 

У сўзида давом этиб, “ўғилларингизни урушдан қутқаринг” деб хитоб қилади. У россияликлардан уруш ҳақида ҳақиқатни айтишни, уруш учун солиқлар тўламасликни ва уддасидан чиқсалар, мамлакатни тарк этишни сўрайди. 

Унинг алоҳида урғулашича, Россиянинг Украинани босиб олиши фақат бошланиши. У Россия уруши фақат Украинага қарши уруш эмаслигини таъкидлайди.. 

“Бу анча кенгроқ. Россия эркинликка қарши уруш бошлади. Бу фақат Украина тупроғида фақат бошланиши. Россия Европадаги барча одамларнинг эркинлигини қўлга киритишга ҳаракат қилмоқда. Дунёдаги барча одамларнинг... Фақат қўпол ва шафқатсиз куч аҳамиятга эга эканини кўрсатишга ҳаракат қилмоқда. Бизни инсон қиладиган ҳамма нарса каби, одамларнинг аҳамияти йўқлигини кўрсатишга ҳаракат қиладиган Россияни тарк эта олсангиз, буни қилинг”, дейди Зеленский. 

Давлат раҳбари жаҳон ҳамжамиятини Россияни тўхтатишга чақирди. 

“Шунинг учун биз ҳаммамиз Россияни тўхтатишимиз керак. Дунё урушни тўхтатиши керак. Мен Украинани ва озодликни қўллаб-қувватлаётган барчага миннатдорлик билдираман. Аммо уруш давом этмоқда. Тинч одамларга қарши террор давом этмоқда. Аллақачон бир ой бўлди. Бу менинг юрагимни, барча украиналикларни ва ер юзидаги ҳар бир эркин одамни синдиради. Шунинг учун урушга қарши чиқишингизни сўрайман”, дея қўшимча қилган Украина раҳбари.