Бронза учун финал. Франция ва Англия терма жамоаларининг ЖЧдаги сўнгги жанги

Франция терма жамоаси бугун, 18 июлдан 19 июльга ўтар кечаси футбол бўйича Жаҳон чемпионатининг учинчи ўрин учун баҳсида Англияга қарши майдонга тушади.

Бронза учун кечадиган баҳсда ярим финалларда фаворит саналган, аммо ҳал қилувчи паллада миллионлаб мухлислар ишончини оқлай олмаган икки жамоа ўзаро тўқнаш келади. Расман бу финал бўлмаса-да, мақоми ва кескинлиги жиҳатидан турнирнинг асосий ўйинидан қолишмайди. Чунки баҳсда нафақат бронза медаллари, балки нуфуз, обрў ва жаҳон чемпионатини бошни баланд кўтарган ҳолда тарк этиш имконияти ҳам ўртага қўйилган.

Учрашувга янада алоҳида қизиқиш бағишлаётган омил — французлар ва инглизлар ўртасидаги тарихий рақобатдир. Бу рақобат футбол доирасидан анча ташқарига чиқади ва ҳар бир ўйин ўзига хос жангга айланади. Қизиқ жиҳатлардан яна бири — учрашувни венесуэлалик ҳакам Хесус Валенсуэла бошқаради. Бу ҳолат мухлислар орасида турли ҳазил ва сўз ўйинларига сабаб бўлган бўлса-да, ҳар икки жамоа учун мазкур ўйин турнирни муносиб тарзда якунлаш имконияти ҳисобланади. 

Дешам учун сўнгги ўйин, Салибанинг жароҳати ва Мбаппенинг мақсади

Франция терма жамоаси учун бу баҳс алоҳида рамзий аҳамиятга эга. У Дидье Дешамнинг миллий жамоа бош мураббийи сифатидаги 14 йиллик фаолиятига якун ясайди. Бу унинг “уч ранглилар” бошқарувидаги 182-ўйини бўлиб, мутлақ рекорд ҳисобланади.

Дешам Францияни олтита йирик мусобақанинг бештасида ярим финалга олиб чиққан ва энг муҳими, 2018 йилги Жаҳон чемпионатида ғолибликни қўлга киритган. Гарчи Евро–2016 ва ЖЧ–2022 финалларида мағлубиятга учраган бўлса-да, айнан у жамоани чуқур инқироздан олиб чиқиб, доимий равишда совринлар учун курашадиган кучли термага айлантирди.

Дешам жорий қилган прагматик ўйин услуби кўп баҳсларга сабаб бўлган. Айримлар бундай юлдузли таркиб билан Франция янада каттароқ ютуқларга эришиши мумкин эди, деб ҳисоблашган. Бироқ натижалар унинг иш услуби ўзини оқлаганини кўрсатди.

Инсайдер Фабрицио Романонинг маълум қилишича, Дешамдан кейин Франция терма жамоаси бош мураббийи этиб Зинедин Зидан тайинланади. Унинг таъкидлашича, бу қарор ўтган йилнинг ноябридаёқ қабул қилинган.

Энди эса Дешам олдидаги асосий вазифа — марказий ҳимоянинг муҳим ўйинчиси Вильям Салибанинг ўрнини тўлдириш турибди. “Арсенал” ҳимоячиси турнир давомида белидаги жароҳат билан, ҳатто оғриқ қолдирувчи уколлар ёрдамида майдонга тушган. У олти учрашувда иштирок этди ва фақат Норвегияга қарши ўйинни ўтказиб юборди. Бироқ бу жасорати унга қимматга тушиши мумкин — шифокорлар Салиба янги мавсумнинг беш ойигача майдондан четда қолиши мумкинлигини айтмоқда.

Шу сабабли Франция ҳимоя чизиғида муаммоларга дуч келган. Бироқ ҳужумда барча етакчилар сафда ва улардан ёрқин ўйин кутилаяпти.

Алоҳида эътибор Килиан Мбаппега қаратилган. У мазкур учрашувда турнирнинг энг яхши тўпурарига айланиш имкониятига эга. Ярим финалга қадар Мбаппе ва Лионель Месси ҳисобида саккизтадан гол бор эди.

Ҳозирча аргентиналик футболчи голли узатмалар сони кўплиги ҳисобига олдинда бормоқда. Агар Мбаппе бу пойгада ғолиб чиқса, у кетма-кет икки Жаҳон чемпионатида “Олтин бутса”ни қўлга киритган тарихдаги илк футболчига айланади. 

Англия ва Тухель босим остида

Ярим финалда Аргентинага 1:2 ҳисобида мағлуб бўлган Англия терма жамоаси ва бош мураббий Томас Тухель қаттиқ танқидларга учради.

Айниқса, учрашув сўнгги дақиқаларидаги тактик қарорлар кўп саволларга сабаб бўлди. Англия 1:0 ҳисобида олдинда бораётган пайтда Тухель бир вақтнинг ўзида уч нафар ҳимоячини майдонга туширди. Айнан шу ўзгаришлардан кейин аргентиналиклар икки гол уриб, ўйин тақдирини ҳал қилди. 

“The Telegraph” нашрининг ёзишича, Тухель футболчиларга орқага чекиниш ёки ҳисобни сақлаш бўйича кўрсатма бермаган. Аксинча, у жамоадан рақибга юқори босим ўтказишни талаб қилган. Бироқ манбанинг қайд этишича, футболчиларнинг ўзи ҳам амалга оширилган алмашинувлардан, айниқса Букайо Саканинг захирада қолдирилганидан ҳайратда бўлган.
Шунга қарамай, Англия терма жамоаси мавжуд вазиятни тузатиш имкониятига эга. Бронза медалларини қўлга киритиш инглизлар учун сўнгги 60 йил ичидаги Жаҳон чемпионатларидаги энг муҳим натижа бўлади.

Бундан ташқари, ғалаба яна бир нохуш анъанага барҳам бериши мумкин. Англия мундиалларда дунё рейтинги биринчи ўнталигидаги жамоалар устидан сўнгги марта 2002 йилда ғалаба қозонган. Шундан буён жамоа кучсиз рақибларни енгиб келган бўлса-да, футбол грандларига қарши ҳал қилувчи ўйинларда доимо омадсизликка учраб келмоқда.

Бу руҳий босимни енгишга на маҳаллий, на хорижлик мураббийлар муваффақ бўлди. Франция устидан қозонилиши мумкин бўлган ғалаба эса Англия терма жамоаси учун янги давр бошланишига туртки бўлиши мумкин. Зеро, баъзан кучли рақиб устидан битта ғалаба ҳам бутун жамоанинг келажагини ўзгартиришга қодир.