Британия Россияга қарши санкцияларни кучайтирди

Буюк Британиянинг Молия вазирлиги Россияга қарши янги санкцияларни кучайтирди. Бу ҳақда Британия ҳукумати хабар берди.

Маълум қилинишича, санкциялар рўйхати 82 та янги позиция билан кенгайтирилган, улардан 20 таси жисмоний шахслар ва 62 таси юридик шахсларга тегишли. Санкциялар рўйхатига тушган ташкилотлар орасида Санкт-Петербург валюта биржаси ва Депозитларни суғурталаш агентлиги ҳам бор.

Янги санкциялар, шунингдек, Россиянинг 46 та молиявий компаниясини қамраб олади.

“Ушбу янги санкциялар Россия иқтисодиётини янада изоляция қилади ва унинг даромад оқимларини бузади”, дейилади расмий баёнотда.

Қолаверса, санкциялар рўйхатига “Сургутинвестнефть”, “ВТБ Регистратор”, “ВТБ Спездепоситарий”, “Оборонрегистр” ва “Реком” каби компаниялар киритилган. Чекловлар Россиянинг “Искандер” қурол-яроғлар тизимини етказиб бериш занжирларига ҳам таъсир қилади ва шунингдек, Украина суверенитети ва демократиясига қарши “ахборот уруши”ни олиб бораётган 14 нафар ижтимоий лойиҳалар агентлиги аъзоларига нисбатан ҳам санкциялар киритилган.

Ушбу чора-тадбирлар Россия иқтисодиётига бўлган халқаро босимни янада кучайтириш мақсадида амалга оширилган.

Эслатиб ўтамиз, АҚШ Президенти Дональд Трамп кеча, 19 май куни россиялик мавқедоши Владимир Путин билан телефон орқали суҳбатдан сўнг Россияга қарши янги санкциялар жорий қилмаслигини маълум қилганди. Буни у Украинадаги урушни тугатиш масаласида ҳали олдинга силжиш имконияти мавжудлиги билан изоҳлаган.