Бразилиялик футболчи ноодатий дисквалификацияга учради

Бразилия Олий спорт суди (ОСС) “Интернасионал” клуби ҳимоячиси Виктор Габриэлни “Крузейро” ҳужумчиси Габриэл Пек тўлиқ соғайгунига қадар ўйинлардан четлаштирди. Бу ҳақда “The Touchline” хабар берди.

Жорий йилнинг 23 июль куни Бразилия чемпионати 19-тур доирасида бўлиб ўтган “Интернасионал” ва “Крузейро” ўртасидаги учрашувнинг 58-дақиқасида Виктор Габриэл рақибига қаттиқ зарба бериб, тўғридан тўғри қизил карточка олган.

Тиббий текширувлар натижасида Габриэл Пекнинг катта болдир суяги сингани аниқланган. Футболчида жарроҳлик амалиёти ўтказилган ва унинг тикланиш жараёни уч-тўрт ой давом этиши кутилмоқда.

Суд қарорида айтилишича, жароҳатнинг оғирлиги инобатга олинса, қоидаларда белгиланган бирдан олти ўйингача бўлган стандарт дисквалификация етарли эмас. Шу сабабли Виктор Габриэл рақиби майдонга қайтгунча дисквалификация қилинган. Шу билан бирга, унинг четлатилиш муддати 180 кундан ошмаслиги белгиланган.

Маълумот учун, Мазкур учрашув “Крузейро”нинг 2:1 ҳисобидаги ғалабаси билан якунланган.