Бразилияда полиция ўтказган йирик операцияда 64 киши ҳалок бўлди

Бразилиянинг Рио-де-Жанейро шаҳрида полиция ва “Қизил жамоа” деб аталувчи жинойий гуруҳ ўртасида шаҳар тарихидаги энг йирик операция чоғида тўқнашувлар юз берди ва оқибатда 64 киши ҳалок бўлди. Бу ҳақда “La Nacion” хабар берди.

Операция кеча, 28 октябрь куни эрталаб шаҳарнинг шимолидаги Пеня ва Алемао туманларида ўтказилган. Унда 2 500 дан ортиқ полициячи қатнашган. Тўқнашувлар оқибатида 64 киши ҳалок бўлган, жумладан, 4 нафар полициячи ҳам. 8 полициячи яраланган, 81 киши ҳибсга олинган, бир неча ўнлаб қурол мусодара қилинган. Полиция 32 та зирҳли машина, 2 вертолёт ва бир неча дрон ёрдамида туманларнинг ичкарисига ҳужум қилган.

Рио-де-Жанейро штати губернатори Клаудио Кастро ўз ижтимоий тармоқларида наркотеррорга қарши қатъий кураш кетаётганини таъкидлаган. 

Унинг айтишича, полиция катта миқдорда наркотик моддаларни қўлга киритган. Операциянинг мақсади – жиноий гуруҳнинг “ҳудудий кенгайишига қарши курашиш” бўлган. Шу билан бирга, Кастро федерал ҳукуматдан ва қуролли кучлардан ёрдам сўраб мурожаат қилган, аммо армия зирҳли техника сўровини уч марта рад этганини маълум қилган. Президент Луис Инасиу Лула да Силва маъмурияти эса бу айбловларни “сайловолди сиёсий ҳаракат” деб атаган.

Эрталабдан бошлаб шаҳарда ўқ овозлари эшитилган, гуруҳ аъзолари бир неча кўчаларни тўсиб, 6 та автобусни ўғирлаб, улардан баррикадалар қурган.

Туманлар аҳолиси ижтимоий тармоқларда ёнаётган автобуслар, тутун устунлари ва узлуксиз ўқ отишмалар акс этган видеоларни улашган. Полициянинг маълум қилишича, жиноятчилар дронлардан гранаталар ташлаган.

Хавфсизлик нуқтаи назаридан университетлар, 46 та мактаб ҳамда 5 та тиббиёт муассасаси вақтинча ёпилган, жамоат транспорти ишлаши издан чиққан. 

Ҳибсга олинганлар орасида “Қизил жамоа” етакчиларидан бири ҳисобланган Тьягу ду Насименту Мендеш ҳамда унинг шериги Николас Фернандес Соарес бор. Улар “Дока” ёки “Урсо” лақаби билан танилган. 

Расмийларнинг таъкидлашича, бу операция 2010 йилдаги машҳур фавелла жангларидан ҳам каттароқ кўламда ўтган. Ўшанда 30 дан ортиқ киши, жумладан, ҳарбийлар ва гумонланувчилар ҳалок бўлган.

Эслатиб ўтамииз, аввалроқ Мексикада полиция йўл бўйидан олти эркакнинг кесилган бошини топганди. Бошларнинг юз қисмидан тери ажратиб олинган ва уларнинг ёнида жиноятчи гуруҳлардан бири томонидан имзоланган деб тахмин қилинаётган ёзувли мато ҳам бўлган. Матн минтақадаги зўравонлик ҳаракатларида айбланаётган шахсларга қаратилган бўлиб, уларга товламачилик ва қотилликлар бўйича айблов қўйилган.