Bolgariyada og‘ir ahvolda qolgan o‘zbekistonliklar mamlakatga qaytarildi

Bolgariya Respublikasida murakkab moddiy va ijtimoiy vaziyatga tushib qolgan 6 nafar O‘zbekiston fuqarosi mamlakatga qaytarildi. Bu haqda O‘zbekiston Respublikasining Istanbul shahridagi Bosh konsulxonasi xabar berdi.

Ma’lum qilinishicha, ko‘rsatilgan amaliy, konsullik va huquqiy yordam natijasida fuqarolar kecha, 16 iyun kuni O‘zbekistonga bepul tarzda olib kelinib, oila a’zolari bag‘riga sog‘-salomat yetib borishlari ta’minlangan.

“Xorijga mehnat faoliyatini amalga oshirish maqsadida chiqishdan avval ish beruvchi, vositachi tashkilot va mehnat shartnomasi haqidagi ma’lumotlarni sinchiklab o‘rganing. Barcha hujjatlarni qonunchilik talablariga muvofiq rasmiylashtiring hamda faqat rasmiy va ishonchli manbalar orqali ishga joylashishga harakat qiling”, deyiladi xabarda.

Shuningdek, shubhali takliflarga ishonish va hujjatlarni rasmiylashtirmasdan xorijga chiqish fuqarolarning murakkab huquqiy va ijtimoiy vaziyatlarga duch kelishiga sabab bo‘lishi mumkinligi aytilgan.

Eslatib o‘tamiz, avvalroq O‘zbekiston elchixonasi va Migratsiya agentligi ko‘magida Serbiyada og‘ir moddiy ahvolga tushib qolgan O‘zbekiston fuqarosi mamlakatga qaytarilgandi.