Болаларга нисбатан уятсиз ҳаракатлар учун жиноий жавобгарлик кучайтирилди

Жамият 5221
image

Ўзбекистонда 16 ёшга тўлмаганлиги айбдорга аён бўлган ҳолда у билан жинсий алоқа қилиш ёки жинсий эҳтиёжни ғайритабиий усулда қондириш ҳамда унга нисбатан зўрлик ишлатмай уятсиз-бузуқ ҳаракатлар содир этиш ҳолатлари учун жавобгарлик чоралари кучайтирилди. Бу ҳақда “Бола ҳуқуқларининг кафолатларини таъминлаш тизими янада такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги Қонунда белгиланди.

Қонун билан киритилган ўзгартиришларга кўра, Жиноят кодексининг 128-моддаси 1-қисмига мувофиқ шахснинг 16 ёшга тўлмаганлиги айбдорга аён бўлган ҳолда у билан жинсий алоқа қилиш ёки жинсий эҳтиёжни ғайритабиий усулда қондириш:

•    480 соатгача (илгари – 360 соатгача) мажбурий жамоат ишлари;
•    ёки 3 йилгача (илгари – икки йилгача) ахлоқ тузатиш ишлари;
•    ёки 1 йилдан 3 йилгача озодликни чеклаш;
•    ёки 1 йилдан уч йилгача озодликдан маҳрум қилиш билан жазоланади.

Шунингдек ЖКнинг 128-моддаси 2-қисм билан тўлдирилди, унга мувофиқ ўша ҳаракатлар моддий қимматликлар бериш ёхуд мулкий манфаатдор этиш орқали содир этилган бўлса:

•    3 йилдан 5 йилгача озодликни чеклаш;
•    ёки 3 йилдан 5 йилгача озодликдан маҳрум қилиш билан жазоланади.

ЖКнинг 128-моддаси 1, 2-қисмларида назарда тутилган ҳаракатлар:

•    такроран ёки хавфли рецидивист томонидан;
•    ЖКнинг 118 ёки 119-моддасида назарда тутилган жиноятларни содир этган шахс томонидан содир этилган бўлса, 5 йилдан 7 йилгача (илгари – 3 йилдан 5 йилгача) озодликдан маҳрум қилиш билан жазоланади.

ЖКнинг 129-моддасига мувофиқ шахснинг 16 ёшга тўлмаганлиги айбдорга аён бўлган ҳолда, унга нисбатан зўрлик ишлатмай уятсиз-бузуқ ҳаракатлар содир этиш:

•    360 соатгача (илгари – 300 соатгача) мажбурий жамоат ишлари;
•    ёки 1 йилдаги 2 йилгача ахлоқ тузатиш ишлари;
•    ёки 1 йилдан 2 йилгача (илгари – 1 йилгача) озодликни чеклаш;
•    ёки 1 йилдан 2 йилгача (илгари – 1 йилгача) озодликдан маҳрум қилиш билан жазоланади.

Ўша ҳаракатлар зўрлик ишлатиб ёки қўрқитиб содир этилган бўлса:

•    2 йилдан 3 йилгача ахлоқ тузатиш ишлари;
•    ёки 2 йилдан 5 йилгача озодликни чеклаш;
•    ёки 2 йилдан 5 йилгача озодликдан маҳрум қилиш билан жазоланади.

Шунингдек ЖКнинг 85, 86-моддасига ўзгартиришлар киритилди, уларга мувофиқ жиноий жавобгарликка тортиладиган энг кичик ёш чегараси 13 ёшдан 14 ёшгача кўтарилди.

Суннатилла Абдуллаев
Мақолага баҳо беринг
Баҳолаганлар: 105
Рейтинг: 3.1
t
×