БМТ дунёни “ҳалокатли инқироз”дан огоҳлантирди

Олам 6301
image

Жаҳон ҳамжамияти ҳозирги озиқ-овқат инқирозига эътибор бермаса, дунё оммавий очарчилик, сиёсий беқарорлик ва назоратсиз миграция хавфи остида қолади. Бу ҳақда БМТ Жаҳон озиқ-овқат дастури ижрочи директори Дэвид Бизли маълум қилди.

“Биз ҳозир мисли кўрилмаган инқирозга дуч келяпмиз, агар уни стратегик ва самарали ҳал қилмасак, биз катта очарчилик, ўнлаб мамлакатларнинг беқарорлашуви ва оммавий миграцияга дуч келамиз”, деган Бизли Жаҳон ишлари бўйича кенгаш ташкил этган муҳокама доирасида.

БМТ вакили келгуси йил бу борада жорий йилгидан “анча ёмон” бўлиши мумкинлигидан огоҳлантирди. Шунингдек, у жаҳон ҳамжамияти яқин 6-12 ой ичида озиқ-овқат нархи ошиши сабабли қийинчиликларга дуч келишини тан олган. Шундан кейин муаммо ҳал этилмаса, дунёни озиқ-овқат тақчиллиги қамраб олиши мумкин.

Бизлининг сўзларига кўра, вазият бошқа омиллар қатори Россия ва Беларусдан жаҳон бозорига ўғитлар етказиб беришдаги чекловлар туфайли ҳам оғирлашмоқда.

Бизли бугун Вашингтондаги бир қатор тадбирларда иштирок этади. У Жаҳон озиқ-овқат дастури фаолиятини молиялаштиришни, шу жумладан хусусий донорлар ҳиссаларини кўпайтириш орқали кўпайтириш зарурлигини эълон қилади.

Дунёда очликдан азият чекаётганлар сони 2021 йилда 828 миллионга етди, бу 2020 йилга нисбатан қарийб 46 миллионга, пандемиядан олдингига қараганда 150 миллионга кўп. Сайёрадаги оч одамларнинг улуши бутун дунё аҳолисининг 9,8 фоизини ташкил этди, бу 2019 йилга нисбатан деярли 2 фоизга кўп демакдир. Озиқ-овқат хавфсизлиги ва тўйиб овқатланмасликнинг асосий сабаблари қаторига можаролар, экстремал иқлим ҳодисалари ва тенгсизликнинг кучайиши фонида иқтисодий зарбалар киради. 

Маълумот учун, Жаҳон озиқ-овқат дастури дунёдаги энг йирик гуманитар ташкилот бўлиб, ҳар йили тахминан 4 миллион тонна озиқ-овқат етказиб беради. У 1961 йилда БМТнинг озиқ-овқат ёрдами агентлиги сифатида ташкил этилган. У очлик ва қашшоқликка қарши кураш орқали ривожланаётган мамлакатлардаги камбағалларга ёрдам бериш билан шуғулланади. Иқтисодий ва ижтимоий ривожланишга ёрдам бериш учун озиқ-овқат ёрдамидан фойдаланади.

Суннатилла Абдуллаев
Мақолага баҳо беринг
Баҳолаганлар: 182
Рейтинг: 2.9
Теглар
t
×