БМТ Афғонистондаги оммавий қатллардан хавотирда

БМТнинг Инсон ҳуқуқлари бўйича бошқармаси Афғонистонда ўтган йили “Толибон” ҳокимият тепасига келганидан бери биринчи марта оммавий қатл ўтказилишидан қаттиқ хавотирда. Бу ҳақда БМТ матбуот хизмати маълум қилди.

Ғарбий Фараҳ вилоятида беш йил аввал бошқа бир одамни пичоқлаб ўлдиргани учун ўлимга ҳукм қилинган бир киши омма олдида қатл этилган. “Толибон” вакилининг айтишича, жабрланувчининг отаси қатлни амалга оширган. Қатл маросимида юқори мартабали амалдорлар иштирок этган. 

Бирлашган Миллатлар Ташкилотининг Инсон ҳуқуқлари бўйича Олий комиссари бошқармаси матбуот котиби Жереми Лоуренс воқеани "жуда ташвишли" деб атади. 

У оммавий қатлларнинг "шафқатсиз, ғайриинсоний ёки қадр-қимматни камситувчи муомала ёки жазо" тури эканини эслатиб, Афғонистон аъзо бўлган Фуқаролик ва сиёсий ҳуқуқлар тўғрисидаги халқаро пакт билан ҳимояланган яшаш ҳуқуқига зид эканини таъкидлади. 

Бир мунча вақт олдин Афғонистон Олий суди ўғирлик ва зино каби жиноятлар учун эркаклар ва аёлларни оммавий равишда қоралашга қайтишни эълон қилди. 

Бугун БМТ ўлим жазоси инсон ҳуқуқларининг асосий тамойилларига мос келмаслиги ва унинг қўлланилиши яшаш ҳуқуқига зид эканлигини эслатди. Ташкилот вакили де-факто Афғонистон ҳукуматини ҳар қандай кейинги қатлларга зудлик билан мораторий жорий этишга ва ўлим жазосини бутунлай бекор қилиш учун тезкор ҳаракат қилишга чақирди.