Блогер Отабек Сатторий иши бўйича апелляция суди ҳукм чиқарди

Бугун, 15 июль куни блогер Отабек Сатторийга оид жиноят ишини апелляция инстанциясида кўриб чиқиш бўйича очиқ суд жараёни ниҳоясига етди.

Мазкур жиноят иши Самарқанд вилоят судининг жиноят ишлари бўйича апелляция судлов ҳайъати томонидан кўриб чиқилди.

Эълон қилинган ажримга кўра, жиноят ишлари бўйича Музработ туман судининг 2021 йил 10 майдаги Отабек Сатторийга нисбатан чиқарилган ҳукми ўзгартирилди.

Суд ҳукмининг Термиз шаҳридаги хусусий нотариал фаолият билан шуғулланувчи нотариус Хамро Бобоқулов томонидан 2020 йил 2 июль куни KSH 032769 SV сонли реестр билан тасдиқланган “Termiz Eko Ekspress loyiha” МЧЖ раҳбари Тўлқин Шопўлатов билан Отабек Сатторий ўртасида тузилган Сурхондарё вилояти, Термиз шаҳар, “Маърифат” маҳалласи, “Истиқлол” кўчаси, 6-уйда жойлашган 42-рақамли квартирани Отабек Сатторийга сотганлиги бўйича тузилган олди-сотди шартномасини ҳамда шу куни KSH 032770 SV сонли реестр билан тасдиқланган “Termiz Eko Ekspress loyiha” масъулияти чекланган жамият раҳбари Тўлқин Шопўлатов билан Отабек Сатторий ўртасида тузилган Сурхондарё вилояти, Термиз шаҳар, “Маърифат” маҳалласи, “Истиқлол” кўчаси, 6-уйда жойлашган 44-рақамли квартирани Отабек Сатторийга сотганлиги бўйича тузилган олди-сотди шартномасини ҳақиқий эмас, деб топиш ҳамда шу билан боғлиқ “Termiz Eko Ekspress loyiha” МЧЖ Т.Шопулатовдан судланувчи О. Сатторий фойдасига 234.835.000 сўмни ундириш қисми бекор қилинди ва жабрланувчи Т. Шопулатовга ушбу юзасидан фуқаровий суд ишларини юритиш тартибида судга мурожаат қилиш ҳуқуқига эга эканлиги тушунтирилди.

Суд ҳукмининг Отабек Сатторий ҳисобидан суд мажлисини видеоконференцалоқа режимида ўтказиш билан боғлиқ 183.750 сўм харажатни ундириш қисми бекор қилинди.

Отабек Сатторийга нисбатан тайинланган озодликдан маҳрум қилиш жазосининг ўташ муддати 2021 йил 30 январь кунидан бошлаб ҳисобланиши белгилади.

Ҳукмнинг қолган қисми ўзгаришсиз қолдирилди.