“Бизни ҳам кучли ҳаяжонда ушлаб турдингиз”. Президент чемпион шахматчиларни табриклади

Бугун, 29 сентябрь куни Президент Шавкат Мирзиёев 46-Бутунжаҳон шахмат олимпиадасида иштирок этган шахмат ва парашахмат бўйича Ўзбекистон терма жамоалари аъзолари ҳамда уларнинг яқинлари билан учрашув ўтказмоқда.

Учрашувда давлат раҳбари шахматчиларни тарихий ғалаба билан яна бир бор табриклаган.

“Икки карра Олимпиада чемпиони деган юксак ва шарафли унвон барчамизга, бутун Ўзбекистон халқига муборак бўлсин!” дейди Президент.

Самарқанддаги Олимпиада оддий спорт мусобақаси бўлмагани таъкидланган. Унда 200 дан ортиқ мамлакатдан қарийб 2 минг шахматчи, жумладан, кучли гроссмейстерлар ва амалдаги чемпионлар жам бўлган.

“Шундай улкан рақобат ичида Ўзбекистон байроғини энг баландга кўтариш бу ҳақиқий жасорат, катта ақл-заковат ва мустаҳкам ирода намунасидир”, дейди давлат раҳбари.

Билдирилишича, Олимпиадани бевосита кузатиш учун Самарқандга 60 мингдан ортиқ меҳмон келган, ҳудудлардаги фан-зоналарда қарийб 500 минг мухлис, телеэкран ва интернет орқали эса миллионлаб ўзбекистонликлар ўйинларни кузатган.

Президент ўзи ҳам ҳал қилувчи партияларни катта қизиқиш билан кўрганини айтган:

“Баъзи партияларда сизлар нафақат рақибларингизни, балки бизни ҳам кучли ҳаяжонда ушлаб турдингиз”.

Давлат раҳбари амалдаги Олимпиада чемпиони Ҳиндистон терма жамоаси билан учрашувга алоҳида тўхталган. Нодирбек Ёқуббоевнинг Ниҳал Саринга қарши партиясида вазият бир пайт жуда оғирлашганини эслаган.

“Лекин сен охиригача мардона курашдинг. Ниҳоятда топқирлик билан қўллаган тактик юришларинг вазиятни бутунлай ўзгартирди ва жамоамизга ҳал қилувчи ғалабани олиб келди”, дейди Президент.

Ҳиндистон устидан ғалабадан сўнг Ўзбекистон якка пешқадамга айланди. Кейин шахматчилар Хитой жамоасини 3:1 ҳисобида мағлуб этиб, жаҳон рейтинги етакчиси ва олти карра Олимпиада чемпиони бўлган АҚШ терма жамоасидан ҳам устун келди.

Президент Нодирбек Абдусатторов бутун мусобақани мағлубиятсиз ўтказиб, биринчи тахтада олтин медални қўлга киритганини эътироф этган. Унинг америкалик Фабиано Каруанага қарши мураккаб эндшпилдаги ғалабаси ҳам алоҳида эсга олинган:

“Бунинг ўзи алоҳида катта натижа!”.

Президент Жавоҳир Синдоровга мурожаат қилиб, бир неча ой аввал унинг Номзодлар турниридаги тарихий ғалабаси нишонланганини эслаган.

“Энди олдингда яна бир улкан марра – жаҳон тожи учун беллашув турибди. Бугун ортингда нафақат жамоадошларинг ва устозларинг, балки қирқ миллионга яқин Ўзбекистон халқи турибди. Биз сенга ишонамиз!” дейди давлат раҳбари.

Йирик мусобақада илк бор иштирок этган Муҳиддин Мадаминов ҳал қилувчи кунда украиналик Роман Деҳтиаровни қора доналарда мағлуб этиб, жамоага олтин медаль учун зарур очкони олиб келди. Мамлакат етакчиси унинг ғайрати ва ғалабалари мухлислар кўнглидан жой олганини таъкидлаган.

Шамсиддин Воҳидов ҳам умумий натижага муносиб ҳисса қўшган. Хусусан, у амалдаги жаҳон чемпиони Гукешга қарши қора доналарда тенгма-тенг курашиб, ўз салоҳиятини намоён этди.

“Бу олтин медалда жамоанинг ҳар бир аъзосининг машаққатли меҳнати ва улкан ҳиссаси бор”, деди Президент.

Ўзбекистон етакчиси шахматчилар ҳақида ҳали китоблар ёзилиши, фильмлар яратилиши ва уларнинг ўйин услуби дарсликларга киришига ишонч билдирган.