Биз охиригача курашамиз - Каннаваро

Кеча, 5 декабрь куни футбол бўйича Жаҳон чемпионатининг гуруҳ босқичига қуръа ташлаш маросими бўлиб ўтди. Унда Ўзбекистон миллий терма жамоаси Португалия, Колумбия ва Ямайка/Конго/Янги Коледония ўтиш ўйини ғолиби билан бирга “K” гуруҳидан жой олди. Ўзбекистон МТЖ бош мураббийи Фабио Каннаваро қуръадан кейинги фикрлари билан ўртоқлашди.

“Бу – жаҳон чемпионати ва унда ҳар қайси рақиб билан рўбарў келиш мумкин. Биз Португалия ва Колумбия билан ўйнаймиз. Албатта, бизнинг футболчиларимиз учун ажойиб лаҳзалар бўлади. Биз мундиалдамиз ва қуръада ҳаммаси рўй бериши мумкин. Биз шу ерда эканлигимиздан хурсандмиз ва умид қиламан биз охиригача курашамиз”,  дейди Фабио Каннаваро қуръа ташлаш маросимидан сўнг.

Маълумот учун, Ўзбекистон миллий терма жамоаси Жаҳон чемпионатини 2026 йил 17 июнь куни Колумбияга қарши баҳс билан бошлайди. Навбатдаги учрашув 23 июнь куни Роналду етакчилигидаги Португалияга қарши бўлиб ўтса, гуруҳ босқичининг сўнгги баҳси 27 июнь куни ўтиш ўйини ғолибига қарши ўтказилади. Учрашувларнинг қайси стадионларда бўлиб ўтиши бугун, 6 декабрь куни эълон қилинади.