Биз Британия мустамлакаси эмасмиз – қирғиз депутати санкциялар ҳақида

Қирғизистон Жогорку Кенеши депутати Исҳоқ Масалиев Қирғизистон Ташқи ишлар вазирлигини “Керемет Банк”га қарши жорий қилинган санкцияларга муносабат билдиришга чақирди. Бу ҳақда у ўзининг Facebook саҳифасида ёзди.

“Дунё ёмон томонга ўзгармоқда, империалистик интилишлар яна жонланмоқда. Буюк Британия Қирғизистоннинг “Керемет Банк”ига санкция қўллади. Гўё Россия билан алоқалари бор эмиш. Агар шундай бўлса, унда улар Россияда ишлаётган миллионлаб фуқароларимизга ҳам санкция қўллаши керак эди”, деди депутат.

Унинг сўзларига кўра, Қирғизистон Буюк Британия олдида ташқи сиёсат ва банк фаолияти бўйича ҳеч қандай мажбуриятларга эга эмас.

“Биз Британиянинг мустамлакаси эмасмиз. Қирғизистон Ташқи ишлар вазирлиги бу масалага, албатта, муносабат билдириш керак, деб ҳисоблайман”, дея қўшимча қилди Масалиев.

Эслатиб ўтамиз, аввалроқ Лондон 2022 йилдан буён Россияга қарши энг йирик санкциялар пакетини эълон қилганди. Унга 107 та янги чеклов киритилган бўлиб, улардан бири Қирғизистондаги “Керемет Банк”га нисбатан жорий этилган.