Бернэм Трампнинг Ирландия ҳақидаги баёнотига жавоб қайтарди

АҚШ Президенти Дональд Трамп Ирландиянинг бирлашиши ҳақидаги баёноти ортидан Британия Бош вазири Энди Бернэм Ирландиянинг бирлашиши масаласидаги позицияси ўзгармаганини маълум қилди. Бу ҳақда мамлакат Бош вазирининг идораси вакили хабар берди.

Бернэмнинг идораси вакили бугун, 12 сентябрь куни Бош вазирнинг Ирландия бирлашиши масаласидаги аввалги баёноти ҳали ҳам ўз кучида эканини айтган.

Британия Бош вазири 9 сентябрь куни парламентда депутатларнинг Шимолий Ирландияда Ирландия Республикаси билан бирлашиш масаласида референдум ўтказилиши эҳтимоли ҳақидаги саволларига жавоб берган эди.

“Мен яна бир референдум ўтказилишини қўллаб-қувватлайдиган жамоатчилик кўпчилиги борлигидан хабарим йўқ. Бу ўзгармагунча, бундай референдум бўлмайди”, деганди Бернэм.

Унинг матбуот котиби Бош вазирнинг ушбу позицияси ҳали ҳам ўзгармаганини қайд этган. Бунга АҚШ Президенти Дональд Трампнинг Ирландияга ташрифи чоғида билдирган фикрлари сабаб бўлди. 

Эслатиб ўтамиз, аввалроқ Трамп Дублинда Ирландия Бош вазири Михол Мартин билан учрашувдан кейин журналистларга Ирландиянинг бирлашишини “жуда исташини” айтганди. Трамп, шунингдек, Ирландиянинг бирлашиши охир-оқибат амалга ошишини таъкидлаган.

Бироқ Британия ҳукумати Шимолий Ирландиянинг конституциявий мақоми бўйича референдум ўтказиш масаласида ўз позициясини ўзгартирмаган. Бернэмнинг айтишича, бунинг учун аввало бундай референдумни қўллаб-қувватловчи кўпчилик жамоатчилик фикри шаклланиши керак.